اتىراۋ وبلىسىندا «سوعىم» جەدەل شاراسى بارىسىندا 11 قىلمىس اشىلدى

استانا. قازاقپارات - اتىراۋ وبلىسىنىڭ اۋماعىندا مال ۇرلىعىنىڭ جولىن كەسۋ، الدىن الۋ جانە ولاردى جاساۋمەن اينالىساتىن تۇلعالاردى انىقتاۋ، بۇعان دەيىن تىركەلگەن مال ۇرلىعى قىلمىستارىن اشۋ ماقساتىندا 20-22 -قازان ارالىعىندا «سوعىم» جەدەل الدىن الۋ ءىس- شارا وتكىزىلدى، دەپ حابارلايدى وبلىستىق ءى ءى د- نىڭ باسپا ءسوز قىزمەتىنەن.

جەدەل ءىس-شارا كەزىندە ءى ءى د كريمينالدى پوليتسيا، اكىمشىلىك پوليتسيا باسقارمالارى قىزمەتكەرلەرى بىرلەسىپ مال ۇرلىقتارىن جاسايتىن ادامداردى ۇستاۋ، جاۋاپكەرشىلىككە تارتۋ، سونداي-اق مال ساتۋمەن اينالىساتىن تۇلعالاردى انىقتاۋ ماقساتىندا مال سويىلاتىن پۋنكتتەر، مال جانە ەت ونىمدەرى ساتىلاتىن ساۋدا نۇكتەلەرىن، اۋىلشارۋاشىلىعى جانۋارلارىن تاسىمالداۋمەن اينالىساتىن كولىك قۇرالدارىن تەكسەرىپ، بىرلەسكەن تۇردە جەدەل ىزدەستىرۋ ءىس- شارالارىن جۇرگىزدى.

ءىس- شارا بارىسىندا وبلىس بويىنشا بارلىعى 200 دەن استام قىزمەتكەر جۇمىلدىرىلىپ، ناتيجەسىندە 150 دەن استام مال جانە 20 دان استام ەت ونىمدەرىن تاسىمالدايتىن كولىكتەر تەكسەرىلدى. جەدەل ءىس-شارالار ناتيجەسىمەن 11 قىلمىس اشىلىپ (ونىڭ ىشىندە 2 قىلمىس وتكەن جىلعى قىلمىستاردىڭ ساناتىنان)، 15 دانا ءىرى قارا مال يەلەرىنە قايتارىلدى.