سيرك عيماراتىندا گراناتا جارىلىپ، 11 ادام جارالاندى

استانا. قازاقپارات - پەرۋ استاناسى ليما قالاسىندا سيركتە گراناتا جارىلىپ، 11 ادام جارالاندى، ونىڭ ىشىندە قويىلىمعا قاتىسۋشىلار بار، ءبىر كلوۋن اۋىر جاراقاتتان اۋرۋحاناعا جەتكىزىلدى، دەپ حابارلادى BBC اگەنتتىگى.

پوليتسيانىڭ حابارلاۋىنشا، جارىلىستى رەكەت-باندىلار جاساعان بولۋى مۇمكىن. اقشا بوپسالاۋ - پەرۋدا بەلەڭ العان قىلمىس ءتۇرى. وندايدان اسىرەسە، قۇرىلىس كومپانيالارى، تاكسي قىزمەتى، جەكە مەكتەپ يەلەرى جاپا شەگەدى.

باس پروكۋراتۋرانىڭ حابارلاۋىنشا، بيىلعى جىلدىڭ العاشقى ءتورت ايىندا اقشا بوپسالاعانى تۋرالى تۇرعىنداردان 1500 ارىز كەلىپ تۇسكەن.