اقتوبەلىك وتباسى 11 بالانى ءوز قامقورلىعىنا الدى- كەسكىن
دەپ حابارلادى www.24.kz.
وتاعاسى دا بارىنشا قولداۋ كورسەتىپ، بالالارعا بار جاعدايدى جاساۋعا تىرىسادى. امانگۇلدىڭ قولىنداعى 3 جاسار ءاليحان وتباسىنىڭ ەڭ كەنجەسى ءارى ەركەسى. بالانى ەكى اي بۇرىن پاتروناتتىق تاربيەگە العان. سودان بەرى ءبۇلدىرشىن اناسىنا ابدەن باۋىر باسقان. ءتىلى بىلدىرلاپ، 10 عا دەيىن سانايدى. ءانۇراندى كۇندە شىرقاۋدى ادەتكە اينالدىرىپتى. ال 11 جاسار دامير - وقۋ وزاتى. ساۋىردەن باستاپ وسى وتباسىنىڭ مۇشەسى.
«وسىنداي وتباسى ەشكىمدە جوق، مەن وتە باقىتتىمىن. ءبىز كۇندە ساباققا بارامىز، مەن مەكتەپتى ۇزدىك ءبىتىردىم. مەنىڭ دوستارىم بار، جاقسى وقيدى»، دەيدى وقۋ وزاتى دامير جەتەسوۆ.
حالىق ءانسامبلىن قۇرعان امانگۇل بالالاردى ونەرگە باۋلىپ ءجۇر. ءبىرى ءان ايتسا، ءبىرى مۋزىكالىق اسپاپتا وينايدى. «ونەرلى بالا مەيىرىمدى بولادى»، - دەيدى كوپبالالى انا. بۇل وتباسىندا ءبىر- بىرىنە قول ۇشىن بەرىپ، قامقورلىق جاساۋ بويعا سىڭگەن قاسيەت.
- ارينە، بالالار ۇيىندە بالالاردىڭ ازايعانى جاقسى. سەبەبى ءوز ۇيىندەگىدەي بولمايدى. ماڭدايلارىنان سيپايتىن ەشكىم جوق. سوندىقتان كەمەلدەنگەن جاسقا كەلگەندە، بالالاردىڭ كوز جاسىن ءسۇرتىپ، بالالارعا ۇلكەن ساۋاپ جاساۋ ادامگەرشىلىگىمىز دەپ ويلايمىن، دەيدى كوپ بالالى انا امانگۇل ەشپانوۆا.
قازىر وبلىستا 1 مىڭ 393 جەتىم بالا بار. وتكەن جىلى 159 بالانى اسىراپ الىپ كەتكەن. ەشقايسىسى شەكارا اسپاي، ەلدە قالدى. 49 وتباسى 77 بالانى پاتروناتتىق تاربيەگە السا، 1000 عا جۋىق جەتىمدى تۋعان- تۋىسى قامقورلىعىنا الىپتى. بيىل سوڭعى 5 ايدا 51 ءسابيدى اسىراپ الۋشىلار تابىلعان.
وبلىستىق ءبىلىم بەرۋ باسقارماسىنىڭ ءبولىم باسشىسى التىنگۇل اۋەزحاننىڭ ايتۋىنشا، 31 ءىن ءوز اعايىندارى السا، 20 بالانى باسقا ازاماتتار العان. بۇل، ءبىر جاعىنان، قازىرگى تاڭدا مەملەكەت تاراپىنان جاسالىپ جاتقان ماتەريالدىق جانە باسقا دا الەۋمەتتىك قولداۋلاردىڭ سالدارىنان دا بولۋى مۇمكىن. مامانداردىڭ ايتۋىنشا، اسىراپ الۋشىلار 3 جاسقا دەيىنگى دەنى ساۋ سابيلەردى قالايدى. قازىر 150 اتا- انانىڭ ءوتىنىشى قارالۋ ۇستىندە.
