الماتى اكىمى ا. ەسىموۆتىڭ تانىسىمىن دەپ اكىمدىكتە قىزمەت ورنىن ساۋدالاعان ايەل 11 جىلعا سوتتالدى
بۇل تۋرالى Tengrinews.kz تىلشىسىنە سوتتالۋشىنىڭ مۇددەسىن قورعاۋشى ادۆوكات عالىم نۇرپەيىسوۆ حابارلادى.
قاۋلى قىلمىستىق ىستەر جونىندەگى مامانداندىرىلعان قالالىق سوتتا شىعارىلدى. «بەلگىلى ءبىر ماماندىقتارمەن اينالىسۋعا ءومىر بويىنا تىيىم سالىندى جانە مۇلكىن تاركىلەي وتىرىپ 11 جىلعا باس بوستاندىعىنان ايىرۋ جازاسى كەسىلدى»، - دەدى سۋديا.
قاۋلى 15 كۇننەن كەيىن كۇشىنە ەنەدى. «شەشىممەن كەلىسپەيمىز، قايتا ارىزداناتىن بولامىز»، - دەدى نۇرپەيىسوۆ.
ەسكە سالا كەتەيىك، 1978 -جىلى تۋىلعان الماتىلىق ايەل «الاياقتىق» جانە «پارا بەرۋ» باپتارى بويىنشا ايىپتالعان بولاتىن. ءىس ماتەريالدارىنا نەگىزدەلگەن ادۆوكاتتىڭ مالىمەتىنشە، 2014 -جىلدىڭ جەلتوقسان ايىندا سوتتالۋشىعا 1982 -جىلعى تانىس قۇربىسى حابارلاسىپ، اكىمدىككە جۇمىسقا تۇرعىزىپ بەرۋدى، ناقتىراق ايتساق، تابيعي مونوپوليالاردى رەتتەۋ دەپارتامەنتىنىڭ باسشىسى قىزمەتىنە تۇرعىزىپ بەرۋدى وتىنگەن.
ءوز كەزەگىندە سوتتالۋشى ونىڭ ءوتىنىشىن ورىنداي الاتىنىن ايتقان، سەبەبى ول قالا اكىمىنىڭ قىزىمەن تانىس دەلىندى. الايدا بۇل ءۇشىن ول ءوز قۇربىسىنان 70 مىڭ دوللار سۇرايدى، بۇل قارجى قىزى ارقىلى اكىمنىڭ وزىنە بارىپ ءتۇسۋى كەرەك بولدى دەلىنەدى. كەيىن ولار 50 مىڭ دوللارعا كەلىسەدى.
كەلىسسوزدەردەن كەيىن سوتتالۋشىدان كومەك سۇراپ بارعان ايەل مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنە 1978 -جىلعى ايەلدىڭ ودان 50 مىڭ دوللار اقشا بوپسالاعانىن جازعان.
2015 -جىلدىڭ 15 -قاڭتارىندا ايەل 50 مىڭ دوللار كولەمىندەگى قاراجاتتى الۋ ۇستىندە ۇستالادى. ءىس ماتەريالدارىندا سوتتالۋشىنىڭ ەسىموۆتىڭ قىزىمەن تانىستىعى ارقىلى اكىمدىككە جۇمىسقا تۇرعىزا الاتىنى جازىلىپ قالعان ءتورت اۋديوجازبا بار. فونەتيكالىق ساراپتاما سويلەۋشىلەردىڭ داۋىسىنىڭ سايكەس كەلەتىنىن انىقتادى.
سوتتا ايىپتالۋشى ەسىموۆتىڭ قىزىن تانىمايتىنىن مويىنداپ، قالا باسشىسىنا كەشىرىم سۇراپ، حات جولدادى.