قازاقستانداعى ينستيتۋتسيونالدى جوبالاردىڭ جالپى پورتفەلى 11 ميلليارد ا ق ش دوللارىن قۇرايدى - ە. دوسايەۆ
بۇل تۋرالى بۇگىن استانا ەكونوميكالىق فورۋمىندا قازاقستان رەسپۋبليكاسىنىڭ ۇلتتىق ەكونوميكا ءمينيسترى ەربولات دوسايەۆ ءمالىم ەتتى.
«قازىرگى ۋاقىتتا ينستيتۋتسيونالدى جوبالاردىڭ جالپى پورتفەلى 11 ميلليارد دوللارعا جۋىقتايدى. ونداعى حالىقارالىق بانكتەردىڭ ۇلەسى 8 ميلليارد دوللاردى قۇرايدى. بۇل بىزگە بەلسەندى ەكونوميكالىق دامۋعا قول جەتكىزۋگە جانە يندۋستريالاندىرۋدىڭ ەكىنشى كەزەڭىن ءساتتى جۇزەگە اسىرۋعا مۇمكىندىك بەرەدى. وتكەن تاجىريبەلەردى پايدالانا وتىرىپ، قازاقستان بۇرىن-سوڭدى بولماعان وندىرىستەردى اشاتىن بولادى»، - دەدى ول «جاھاندىق ەكونوميكاداعى ەكونوميكالىق قارجىلىق جانە مونەتارلىق وزگەرىستەر» اتتى جوعارى كونفەرەنتسياسىندا.
ە. دوسايەۆتىڭ حابارلاۋىنشا، باعدارلامانىڭ نەگىزگى باسىم باعىتتارىنىڭ ءبىرى اۋىل شارۋاشىلىعى سالاسى بولىپ تابىلادى.
«اۋىل شارۋاشىلىعى سالاسى دا ەكونوميكانى ءارتاراپتاندىرۋعا جانە جاڭا جۇمىس ورىندارىن قۇرۋعا، سونىمەن قاتار قوسىمشا ينۆەستيتسيالاردى تارتۋعا ءوز سەپتىگىن تيگىزە الادى. بۇل سالا دامۋ باعدارلاماسىنىڭ ماڭىزدى بولىگى»، - دەپ اتاپ ءوتتى مينيستر.
اۆتور: جاسۇلان جولدىبايەۆ
