نيۋ-يوركتەگى 11 - قىركۇيەك وقيعاسىنىڭ شىندىعى ەندى اشىلدى
بۇل لاڭكەستىك ارەكەتكە ا ق ش يراكتى ايىپتاعان. ءبىراق باعداتتىڭ جازىعى بولماي شىقتى.
تاياۋدا ورتالىق بارلاۋ باسقارماسى (و ب ب) قۇپيا قۇجاتتىڭ مالىمەتتەرىن جاريا ەتتى.
وعان سايكەس، 2003 - جىلى ا ق ش اسكەرى باسىپ كىرگەن يراكتىڭ 2001 - جىلعى 11 - قىركۇيەكتەگى لاڭكەستىككە ەش قاتىسى جوق ەكەنى بەلگىلى بولعان.
سەناتور كارل لەۆيننىڭ سۇراۋى بويىنشا جازىلعان قۇپيا حات جايىندا «ريا نوۆوستي» حابار تاراتتى، دەپ جازادى لەنتا. ر ۋ.
اتالمىش حات 2001 - جىلعى لاڭكەستىكتى ۇيىمداستىرۋشىلاردىڭ ءبىرى موحاممەد اتتا پراگادا يراك بارلاۋ قىزمەتىنىڭ وكىلىمەن كەزدەستى دەگەن بولجامدى جوققا شىعاردى. بۇل بولجامدى سول كەزدەگى ا ق ش ۆيتسە-پرەزيدەنتى ديك چەيني بىرنەشە مارتە قايتالاپ، اقىرى سوڭىندا ا ق ش-تىڭ يراكقا باسىپ كىرۋىنە سەبەپ بولدى.
ال يراكتىڭ لاڭكەستىككە قاتىسى، سونداي-اق ەلدە جاپپاي قىرىپ-جويۋ قارۋى بار دەگەن بولجامداردىڭ ءبارى كۇنى بۇگىنگە دەيىن راستالماعان ەدى. و ب ب 2003 - جىلدىڭ وزىندە-اق اتتانىڭ يراك بارلاۋشىسىمەن كەزدەستى دەگەن بولجامعا كۇدىكپەن قارادى، دەپ جازىلعان و ب ب ديرەكتورى دجون بەنناننىڭ سەناتور ليەۆينگە جازعان حاتىندا.
لەۆين بەيسەنبى كۇنى سەناتتا بۇرىنعى ۆيتسە-پرەزيدەنت چەينيدى سىناپ بايانداما جاساپ: «ۆيتسە-پرەزيدەنت ديك چەيني بىرنەشە رەت، سونداي-اق تەلەارنالار ارقىلى دا، اتالمىش كەزدەسۋ تۋرالى جار سالىپ، ونى دالەلدەيتىن ايعاقتار بارىن دا ءمالىم ەتكەن بولاتىن. بۇل كەزدەسۋ قوعامدىق پىكىردى ساددام (حۋسەين) 11 - قىركۇيەكتە شابۋىل جاساعان «ءال-كايدا» لاڭكەستەرىمەن بىرگە بولدى دەگەن بولجامعا سەندىرۋدىڭ نەگىزگى دايەگى بولدى»، - دەدى.
ءتۇرلى مالىمەتتەر بويىنشا، ا ق ش-تىڭ يراكقا باسىپ كىرۋى كەزىندە 100 مىڭنان اسا ادام وپات بولدى، ونىڭ 4,5 مىڭى -ا ق ش اسكەري قىزمەتكەرلەر ەكەندىگى انىقتالعان.
turkystan.kz
