ۇلتتىق قۇرىلتايدىڭ قۇرامىندا 117 ادام بار

None
None
ۇلىتاۋ. قازاقپارات - مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ جۇمىسىنداعى ماڭىزدى باعىتتاردى اتادى، دەپ حابارلايدى قازاقپارات ءتىلشىسى

«ەندى، ۇلتتىق قۇرىلتايدىڭ جۇمىسىن ۇيىمداستىرۋ ماسەلەسىنە توقتالسام.

ونىڭ قۇرامىندا 117 ادام بار. قۇرىلتايعا بارلىق وبلىستىڭ، سان ءتۇرلى سالانىڭ، ءار بۋىننىڭ وكىلدەرى قاتىسىپ وتىر. ءبىز كوپتى كورگەن ەل اعالارىنىڭ اقىل-كەڭەسىنە جۇگىنەمىز. بەلسەندى ازاماتتىق ۇستانىمى بار ورتا بۋىننىڭ تاجىريبەسىن ەسكەرەمىز. جاڭاشا ويلايتىن جاستاردىڭ تىڭ يدەيالارىن قولدايمىز»، - دەدى مەملەكەت باسشىسى ۇلىتاۋداعى قۇرىلتايدا.

پرەزيدەنتتىڭ پايىمىنشا، قۇرىلتايدىڭ جۇمىسى ساپالى بولۋى ءۇشىن ەلدىڭ جوعىن جوقتايتىن ازاماتتار باس قوسۋى كەرەك.

بىزدە ءتۇرلى پىكىرتالاس ورىندارى بار. ءبىراق ۇلتتىق قۇرىلتايدىڭ ورنى ءبىر بولەك. قۇرىلتاي - كەڭ اۋقىمدى جيىن. ءبىراق بۇل جۇمىستىڭ ساپاسىنا كەرى اسەر ەتپەۋى كەرەك. وتىرىستاردى مۇقيات ۇيىمداستىرۋىمىز قاجەت. بۇل جەردە شىن مانىندە حالىقتىڭ ءۇنى ەستىلۋگە ءتيىس. كەز كەلگەن ادامدى قۇرىلتايعا قاتىستىرۋعا بولمايدى. جۇرتتىڭ مۇڭ- مۇقتاجىن، تالاپ-تىلەگىن جەتكىزەتىن ازاماتتار باس قوسۋى كەرەك»، - دەدى قاسىم-جومارت توقايەۆ.

ايتا كەتەيىك، پرەزيدەنت ۇلىتاۋ وبلىسىنداعى جۇمىس ساپارى اياسىندا ۇلتتىق قۇرىلتايدىڭ العاشقى وتىرىسىنا قاتىسىپ جاتىر.

كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.

ۇلتتىق قۇرىلتايدىڭ قازىرگى قۇرامىندا ءماجىلىس دەپۋتاتتارى مەن ق ح ا مۇشەلەرىنەن، ازاماتتىق قوعام مەن ساياسي پارتيا وكىلدەرىنەن، ساراپشىلار مەن وڭىرلەردەگى قوعامدىق كەڭەس مۇشەلەرىنەن، كاسىپكەرلەردەن جاساقتالعان 117 ادام بار.

سولاردىڭ ءبىر پاراسىن اتاساق، اقىن مۇحتار شاحانوۆ، قازاقتىڭ تۇڭعىش عارىشكەرى توقتار اۋباكىروۆ، اكادەميك اسقار جۇمادىلدايەۆ، ەكونوميست جاقسىبەك كۇلەكەيەۆ، ساياساتكەر ءاليحان بايمەنوۆ، جۋرناليست، مەديا-مەنەدجەر، قوعام قايراتكەرى ەرمۇرات باپي، پارلامەنتتىڭ بىرنەشە شاقىرىلىمىنىڭ دەپۋتاتى نۇرتاي سابيليانوۆ، بالۋان داۋلەت تۇرلىحانوۆ، عالىم-بيوتەحنولوگ كۇنسۇلۋ زاكاريا، ءدىنتانۋشى قايرات جولدىباي، عالىم انار فازىلجانوۆا سياقتى ەسىمدەر بار.

مەملەكەتتىك كەڭەسشى ەرلان قاريننىڭ جازباسىنا سۇيەنسەك، كەلەشەكتە قۇرىلتاي جۇمىسىنا قاتىسۋشىلار اۋىستىرىلىپ وتىرۋى مۇمكىن.

سوڭعى جاڭالىقتار