تۇركىستانداعى «ازىرەت سۇلتان» قورىق- مۋزەيىنىڭ قورى 114 جادىگەرمەن تولىقتى
«مۋزەيگە سىي» اكسياسى اياسىندا قالا تۇرعىندارى مەن قوناقتارى اكەلگەن جادىگەرلەر ەل نازارىنا ۇسىنىلدى، دەپ حابارلايدى قازاقپارات ءتىلشىسى.
ەلباسى ن. ءا. نازاربايەۆ «بولاشاققا باعدار: رۋحاني جاڭعىرۋ» ماقالاسىندا: «اتا بابالارىمىزدان مۇرا بولىپ قالعان كەڭ بايتاق جەرىمىزدى، تاريحي- مادەني قۇندىلىقتارىمىزدى، تاريحىمىزدى، ىزگى قاسيەتتەرىمىزدى ساقتاپ جانە دە جاڭعىرتۋىمىز قاجەت. ويتكەنى ۇرپاق ساناسىندا ۇلتتىق رۋح ماڭگى قالۋعا ءتيىس» دەپ، تاريحي جادىگەرلەر ماڭىزدىلىعى مەن قورعاۋ ماسەلەسىن باسا ايتقان بولاتىن.
وسى ورايدا، قورىق- مۋزەيىندە ارنايى كورمە ۇيىمداستىرىلىپ، وندا مۋزەي جاناشىرلارى تاريحي، ەتنوگرافيالىق باعىتتاعى كونە دۇنيەلەرىن كورمەگە اكەلدى. وسىلايشا مۇراجاي جالپى قورى 114 جادىگەرمەن تولىقتى. اتا- بابادان مۇرا بولىپ، ساقتالىپ كەلە جاتقان قۇندى دۇنيەلەردى مۋزەيگە تابىستاۋشىلار اراسىندا تۇركىستان قالاسىنىڭ تۇرعىنى «اجەلەر» ءانسامبلىنىڭ مۇشەسى، قالادا وتەتىن ءىس- شارالاردىڭ بەلسەندى قاتىسۋشىسى جاقسىگۇل تولەنتايەۆا دا بار. ول مۋزەيگە ەتنوگرافيالىق جانە بونيستيكالىق باعىتتاعى جالپى سانى 30-عا جۋىق زات تاپسىردى. ايتا كەتەيىك، «ازىرەت سۇلتان» قورىق- مۋزەيى اشىلعاندا نەبارى 300 جادىگەردەن قۇرالعان قۇندىلىقتار قورى قازىرگى كۇندە 24082 جادىگەرگە جەتكەن.
«كورمە ەكسپوزيتسياسىندا ەلباسى ن. ءا. نازاربايەۆتىڭ مۋزەيگە سىيعا تارتقان قۇران كىتابىنان باستاپ شەتەل باسشىلارىنىڭ تارتۋلارى دا بار. سونىمەن قاتار ەلىمىزدىڭ قوعام قايراتكەرلەرى، اۋەسقوي ارحەولوگ، مۋزەي قىزمەتكەرلەرى جانە قاراپايىم حالىقتىڭ كۇندەلىكتى تۇرمىستا قولدانعان ەتنوگرافيالىق، ارحەولوگيالىق جانە جازبا ەسكەرتكىشتەرى دە كەزدەسەدى. جىل سايىن ءوتىپ وتىراتىن اكتسيا اياسىندا مەملەكەت جانە قوعام قايراتكەرى وزبەكالى جانىبەكوۆتىڭ ۇلى باۋىرجان جانىبەكوۆ اكەسىنىڭ جەكە كىتاپحانا قورىنداعى 18 دانا كىتاپتى تابىستاعان بولاتىن. تابىستالعان كىتاپتار - شەتەلدىك بىرەگەي ادەبيەت تۋىندىلارى. مۋزەي ءىسى مەن وتاندىق ونەر سالاسىنا قاتىستى ءاربىر كىتاپتا وزبەكالى جانىبەكوۆتىڭ ءوز قولتاڭباسى بار» - دەيدى مادەني وردانىڭ قىزمەتكەرلەرى.
اۆتور: اينۇر اقبايەۆا
