برەجنيەۆتىڭ قونايەۆقا سىيلاعان زي ل-114 اۆتوموبيلى قايدا؟
بۇگىن الماتىدا د. ا. قونايەۆتى ەسكە الۋ شاراسى بارىسىندا «قازاقپارات» تىلشىسىنە بەرگەن سۇحباتىندا د. ا. قونايەۆ مۇراجايىنىڭ ديرەكتورى تيمۋر جۇمانوۆ وسىلاي دەدى.
ونىڭ ايتۋىنشا، وتكەن عاسىردىڭ 90- جىلدارى جەكەشەلەندىرۋ كەزىندە جەڭىل اۆتوكولىك جەكە قولعا ءوتىپ كەتكەن ەكەن.
«بۇل قازاقستانداعى جالعىز كورنەكى جەڭىل اۆتوكولىك. ونى شامامەن وتكەن عاسىردىڭ 70- جىلدارىنىڭ باسىندا ك س ر و ورتالىق كوميتەتىنىڭ باس حاتشىسى ل. ي. برەجنيەۆ سول كەزدەگى قازاقستان كومپارتياسى ورتالىق كوميتەتىنىڭ ءبىرىنشى حاتشىسى دىنمۇحامەد احمەت ۇلى قونايەۆقا سىيلاعان ەكەن. ويتكەنى د. ا. قونايەۆ سول كەزەڭدە ساياسي بيۋرونىڭ مۇشەلىگىنە وتكەن. برەجنيەۆتىڭ ءوزى ز ي ل-117 اۆتوكولىگىنە اۋىسقان. مۇنداي اۆتوكولىك سول كەزدە باسقا كەڭەستىك رەسپۋبليكا باسشىلارىنىڭ بىردە- بىرىندە بولماعان. دىنمۇحامەد احمەت ۇلى بۇل ماشينامەن كوبىنەسە قالا ىشىندە جۇرگەن»، - دەدى ت. جۇمانوۆ.
ول سونىمەن قاتار، بۇگىندە جەكە قولدا جۇرگەن تاريحي اۆتوكولىكتى مۇراجايعا الدىرۋدى كوزدەيتىندىگىن جەتكىزدى.
«ەندى بۇل اۆتوكولىك سول كەزدە ۇكىمەتتىڭ بالانسىندا بولعان عوي. دىنمۇحامەد احمەت ۇلى ورنىنان كەتكەن سوڭ، ول ورتالىق كوميتەتتىڭ ارنايى گاراجىندا ساقتالعان. ءبىراق كەيىن، 90- جىلدارى جەكەشەلەندىرۋ كەزىندە جەكە قولعا ءوتىپ كەتكەن. ءبىزدىڭ ەستۋىمىزشە، ول قازىر استانا جاقتا جەكە قولدا جۇرگەنگە ۇقسايدى. ونىڭ باعاسى ارينە، سۇمدىق قىمبات. ءبىراق، سول تاريحي اۆتوكولىكتى ءبىز د. ا. قونايەۆتىڭ مۇراجايىنا قالايدا الدىرساق دەگەن نيەتىمىز بار. قازىر وسىعان بايلانىستى ىزدەستىرۋ جۇمىستارىن جۇرگىزىپ جاتىرمىز»، - دەدى ت. جۇمانوۆ.
ال قازىر، د. ا. قونايەۆ تۇرعان تۇرعىن ءۇيدىڭ اۋلاسىندا «Pontiac Grand Prix» اۆتوكولىگى قويىلعان. بۇل، دىنمۇحامەد احمەت ۇلىنىڭ جالعىز جانە جەكە اۆتوكولىگى. ونى 1992 - جىلى الماتىلىق جاس بيزنەسمەندەر سىيلاعان ەكەن.
ايتا كەتەلىك، ز ي ل-114 از سەريامەن شىعارىلعان ەڭ جوعارى كلاستى كەڭەستىك اۆتوموبيل. شاناعى «ليمۋزين» تيپتەس. بارلىعى 113 دانا شىعارىلعان. ونى زاۋىتتا ارنايى بريگادا قولمەن جينايتىن بولعان جانە ءاربىر قوسالقى بولشەگىنە شاناقتىڭ ءنومىر باسىلىپ وتىرعان.
اۆتور: جاپپاربەرگەن ايبوتا
