تۇركيادا قيراعان عيماراتتار ءۇشىن 113 ادامدى قاماۋعا الۋ تۋرالى وردەر بەرىلدى
تۇركيانىڭ ۆيتسە-پرەزيدەنتى فۋات وكتايدىڭ ايتۋىنشا، جەر سىلكىنىسى سالدارىنان قيراعان عيماراتتار ءۇشىن 131 كۇدىكتى انىقتالدى، ونىڭ بىرەۋى قاماۋعا الىندى، تاعى 113 ادامدى قاماۋعا الۋ تۋرالى وردەر بەرىلدى.
بۇعان دەيىن تۇركيانىڭ اپاتتار مەن توتەنشە جاعدايلار باسقارماسى (AFAD) جەر سىلكىنىسى سالدارىنان 80278 ادام زارداپ شەككەنىن حابارلاعان. وقيعا ورىندارىندا كەمىندە 218406 قۇتقارۋشى جۇمىس ىستەپ جاتىر.
اپتا باسىندا كاحرامانماراش پروۆينتسياسىندا بولعان 7,7 جانە 7,6 بالدىق ءزىلزالا دۇمپۋلەرى ادانا، اديامان، ديارباكىر، گازيانتەپ، حاتاي، كيليس، مالاتيا، وسمانيە جانە شانلىۋرفا سياقتى 10 پروۆينسيادا جانە كورشىلەس سيريا مەن ليۆاندا سەزىلدى.
سونىمەن قاتار، ەلدىڭ قورشاعان ورتا، ۋربانيزاتسيا جانە كليماتتىڭ وزگەرۋى ءمينيسترى مۇرات كۋرۋم 10 پروۆينتسياداعى 171 882 عيماراتقا تەكسەرۋ جۇرگىزىلگەنىن ايتتى.
«ءبىز 24921 عيماراتتا بارلىعى 120940 قۇرىلىستىڭ قۇلاعانىن، شۇعىل بۇزۋدى قاجەت ەتەتىنىن نەمەسە قاتتى زاقىمدالعانىن انىقتادىق»، - دەدى م. كۋرۋم.
وعان قوسا، 10 پروۆينسيادا 122279 عيمارات شامالى زاقىمدانعان نەمەسە مۇلدە زاقىم كەلمەگەن.
بۇعان دەيىن تۇركياداعى جەر سىلكىنىسىنە بايلانىستى شانلىۋرفا ايماعىندا 8 ادام قاماۋعا الىنعانى، حاتايدا جەر سىلكىنىسى كەزىندە قۇلاعان Rِnesans Rezidans تۇرعىن ءۇي كەشەنىنىڭ ساۋلەتشىسى مەحمەت ياشار دجوشكۋننىڭ ىستانبۇل اۋەجايىندا ۇستالعانى حابارلانعان ەدى.