سىبىردە 111 جاستاعى قازاق مايدانگەر قاپكەن سۇلەيمەنوۆكە قۇرمەت كورسەتىلدى - فوتو
اۆتونوميا باسشىسى ارداگەردى قۇتتىقتاي كەلە، تۇمەن قازاقتارى داڭقتى جەرلەستەرىنىڭ مايدان جانە ەڭبەك جولىنداعى جانقيارلىق ەڭبەگىن جوعارى باعالايتىندىعىن، حالىق پەن ەلگە قىزمەت ەتۋدىڭ جارقىن ۇلگىسى رەتىندە ماقتان تۇتاتىندىعىن اتاپ ءوتتى. ايتا كەتەرلىگى، پۋلەمەتشى قاپكەن سۇلەيمەنوۆ 1941-1945 -جىلدارى ارالىعىندا قان مايداندا ەرلىكپەن سوعىسسا، بەيبىت ومىردە 30 جىل بويى كەڭشاردىڭ مالىن باققان ەدى.
بۇگىندە قارت مايدانگەر تۇمەن وبلىسىنىڭ ومۋتينسك اۋدانىنا قاراستى رۋساكوۆا اۋىلىندا 75 جاستاعى قىزى ماعايشانىڭ قولىندا تۇرىپ جاتىر. جىلجىپ وتكەن جىلدار ونىڭ ەستە ساقتاۋ قابىلەتىنە نۇسقان كەلتىرگەن. اقساقال اۋىل تۇرعىندارىنىڭ باسىم كوپشىلىگىن تاني بەرمەيدى. الايدا، رۋساكوۆاعا ۇنەمى كەلىپ تۇراتىن قازاق اۆتونومياسىنىڭ جەتەكشىسى ەسەنعالي يبرايەۆتى جاقىن تۋىسى رەتىندە تانيدى. قاپكەن اتا قوناقتارىن زور قۋانىشپەن قارسى الىپ، قۇرمەت كورسەتىپ، سىيلىق بەرگەندەرى ءۇشىن العىسىن بىلدىرە كەلە وبلىستاعى قازاقتاردىڭ تىنىس- تىرشىلىگىن سۇراپ ءبىلدى. جالپى، اقساقال كۇن سايىن قازاقستان تەلەارنالارىنداعى باعدارلامالاردى تاماشالايدى، اسىرەسە، ايتىستى، دومبىرا ءۇنىن ەستىگەندى جاقسى كورەدى. سول ءۇشىن انتەننا تاباقشاسىن دا ورناتقىزىپ العان. الايدا، وكىنىشكە وراي جىل سايىن قۇلاق ەستۋى ناشارلاپ بارادى. ءتىپتى، كەيىنگى كەزدە ەستۋ اپپاراتىنىڭ دا پايداسى بولماي تۇر. ءبىراق، قازاق قارتىنىڭ قولى قارۋلى، كەزىندە باتىرلارعا ءتان كۇشتىڭ يەسى بولعانى بايقالادى. قىزى ماعايشا دا اكەسىنىڭ ەرتەرەكتە اتتىڭ ۇستىندە وتىرىپ، ءبىر قولىمەن استىق تولى قاپتى الدىنا ەركىن وڭگەرىپ الاتىندىعىن ايتادى.
قاپكەن سۇلەيمەنوۆ 1904 -جىلى 15 -جەلتوقساندا سولتۇستىك قازاقستان وبلىسىنىڭ پرەسنوۆسك اۋدانىنا قاراستى بايان اۋىلىندا بولىس بيلەۋشىسىنىڭ وتباسىنا دۇنيەگە كەلگەن ەدى. ۇجىمداستىرۋ جىلدارىندا اكەسى جەر اۋدارىلىپ كەتە بارعان. گولوشەكيننىڭ سولاقاي ساياساتىنان تۋىنداعان اشارشىلىق جىلدارى وتباسى تۇمەن وبلىسىنىڭ اۋماعىنا كوشىپ كەلىپ وسى جەرگە قونىستانىپ قالعان. قاپكەن سۇلەيمەنوۆ ەكىنشى ۋكراينا مايدانى قۇرامىندا سوعىسىپ، ۆەنگريا، چەحوسلاۆاكيا، گەرمانيا جەرلەرىندەگى ۇرىستارعا قاتىستى. ول كەزەكتى شايقاس بارىسىندا اۋىر جاراقاتتانىپ، بۋداپەشت تۇبىندەگى گوسپيتالدە جاتقان كەزىندە جەڭىسكە جەتكەندەرىن ەستىدى.
بۇل كۇندەرى قازاقتىڭ ۇزاق جاساعان قارت مايدانگەرىنە اۋىلدىق، اۋداندىق جانە وبلىستىق بيلىك وكىلدەرى، مەكتەپ وقۋشىلارى قۇرمەت كورسەتۋدە.
اۆتور: مارلان جيەمباي
