بۇگىن قانابەك بايسەيىتوۆتىڭ تۋعانىنا - 111 جىل

استانا. قازاقپارات - بۇگىن ءانشى- اكتەر، رەجيسسەر، دراماتۋرگ، قازاقستاننىڭ حالىق ءارتىسى بايسەيىتوۆ قانابەك دۇنيەگە كەلگەن كۇن.

ول 1905-جىلى الماتى وبلىسىندا تۋعان.

جاستايىنان ءان سالىپ، «ءانشى بالا» اتانادى. 1920-جىلدان قىزمەتكە ارالاسا باستايدى. اۋىلداعى ساۋات اشۋ مەكتەبىندە وقىتۋشى بولادى. قازاق پەداگوگيكالىق تەحنيكۋمىن بىتىرگەن. وسى تەحنيكۋمدا وقىپ جۇرگەندە، 1926-جىلى تەحنيكۋم ونەرپازدارى قويعان ج. ءشانيننىڭ «ارقالىق باتىر» سپەكتاكلىندەگى ارقالىق ءرولىن ويناپ، اكتەرلىك تالانتىن بايقاتادى. 1927-جىلى ۇيىمداستىرىلعان جاستار تەاترىنىڭ رەجيسسەرى بولدى. 1929-جىلى قازاق دراما تەاترىنا قابىلداندى. اكتەرلىك قىزمەتىمەن قاتار، پەسالار («وزبىر بولىس»، «زاۋرە»، «تارتىس»، «كەلىنشەك»، ت. ب.) جازىپ، ورىس جازۋشىلارىنىڭ بىرنەشە پەساسىن قازاقشاعا اۋداردى.

قازىرگى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا م. اۋەزوۆ پەن ي. كوتسىكتىڭ «ايمان - شولپانىندا» ارىستاننىڭ تۇلعاسىن ساحنالادى. تولەگەن، تارعىن، اباي، ارىستان حان سياقتى ءتۇرلى سيپاتتاعى وپەرالىق وبرازداردى سومدادى. ول قازاق وپەرا جانە بالەت تەاترىنىڭ (اباي اتىنداعى قازاق مەملەكەتتىك اكادەميالىق وپەرا جانە بالەت تەاترى) العاشقى رەجيسەرلەرىنىڭ ءبىرى رەتىندە «اباي»، «قامار سۇلۋ»، «قىز جىبەك»، «دۋداراي»، «دايسي»، «ەۆگەنيي ونەگين»، «كنياز يگور» وپەرالارىن ساحناعا شىعاردى.

كوپتەگەن كينوفيلمدەردە ويناپ، دراماتۋرگيا سالاسىندا دا جەمىستى ەڭبەك ەتتى. «بەۋ، قىزدار-اي»، «وي، جىگىتتەر-اي» كومەديالارىنىڭ، «دوستىق جولىمەن» بالەتىنىڭ جانە «ايسۇلۋ»، «التىن تاۋلار» اتتى وپەرالاردىڭ ليبرەتتولارىن (ق. شاڭعىتبايەۆپەن بىرگە) جازدى. ونىڭ «قۇشتار كوڭىل» كىتابى قازاق، ورىس تىلدەرىندە جارىق كوردى. 1979-جىلى قايتىس بولعان.

ەڭبەك قىزىل تۋ، «قۇرمەت بەلگىسى» وردەندەرمەن، مەدالدارمەن ماراپاتتالعان.