ادام ساۋداسى: جىل باسىنان بەرى 110 قىلمىس جاسالدى

بۇل تۋرالى باس پروكۋراتۋرا جانىنداعى قۇقىق قورعاۋ ورگاندارى اكادەمياسى رەكتورىنىڭ مىندەتىن اتقارۋشى قاليوللا سەيتەنوۆ ءمالىم ەتتى، دەپ حابارلايدى قازاقپارات ءتىلشىسى.
«ادام ساۋداسى ماسەلەسى بارلىق ەلگە ورتاق. ونىڭ ىشىندە قازاقستان دا بار. بيىل جىل باسىنان بەرى ادام ساۋداسى بويىنشا 110 قىلمىس انىقتالدى. دەگەنمەن بۇل تەك رەسمي دەرەك. حالىقارالىق ۇيىمدار مەن ۇكىمەتتىك ەمەس ۇيىمداردىڭ دەرەگىنشە ەڭبەك جانە سەكسۋالدى قۇلدىققا تاپ بولعانداردىڭ سانى الدەقايدا كوپ. قازاقستان ادام قۇقىقتارى سالاسىنداعى 60 تان استام شارتتىڭ تولىق قاتىسۋشىسى. ونىڭ ىشىندە 13 شارت قۇلدىقپەن كۇرەسكە بايلانىستى» ، - دەدى قاليوللا سەيتەنوۆ ەلوردادا ءوتىپ جاتقان حالىقارالىق كونفەرەنتسيادا.
ونىڭ مالىمدەۋىنشە، مەملەكەت باسشىسىنىڭ تاپسىرماسى بويىنشا «ادام ساۋداسىنا قارسى ءىس- قيمىل تۋرالى» زاڭ جوباسى ازىرلەندى.
«جاڭا زاڭ جوباسى 6 تاراۋدان تۇرادى جانە بىرنەشە مىندەتتى ىسكە اسىرۋعا باعىتتالعان. اتاپ ايتقاندا، مەملەكەتتىك ساياساتتىڭ قۇقىقتىق جانە ۇيىمداستىرۋشىلىق نەگىزدەرىن قۇرۋ، جەكەلەگەن ۇعىمداردى حالىقارالىق ستاندارتتارعا سايكەس كەلتىرۋ، قارسى ءىس- قيمىل سۋبەكتىلەرى بولىپ تابىلاتىن مەملەكەتتىك ورگاندار مەن ۇكىمەتتىك ەمەس ۇيىمداردىڭ ۋاكىلەتتى ورگانىن ايقىنداۋ.
سونىمەن قاتار ۋاكىلەتتى ورگانداردىڭ قۇزىرەتىن بەكىتۋ، ۆەدومستۆوارالىق ۇيلەستىرۋ جانە ءوزارا ءىس- قيمىل ماسەلەلەرىن رەتتەۋ، ساۋدا قۇرباندارىنا كومەك كورسەتۋ جانە كامەلەتكە تولماعان جابىرلەنۋشىلەردىڭ قۇقىعىن قورعاۋ»، - دەيدى اكادەميا باسشىسى.
بۇعان دەيىن حابارلاعانىمىزداي، بۇگىن ەلوردادا «ادام ساۋداسىنا قارسى كۇرەستە ۇلتتىق جانە حالىقارالىق سەرىكتەستىكتى نىعايتۋ» اتتى حالىقارالىق كونفەرەنسيا ءوتىپ جاتىر.
اتالعان ءىس- شاراعا قاتىسۋشىلار اراسىندا قازاقستان، قىرعىزستان، وزبەكستان، تۇركمەنستان جانە تاجىكستان ەلدەرىنىڭ وكىلدەرى دە بار.