الماتى وبلىسىندا مال ۇرلىعىنا قاتىسى بار 110 كۇدىكتى ۇستالدى
ءتارتىپ ساقشىلارى «مال ۇرلىعى» جەدەل الدىن الۋ ءىس-شاراسى بارىسىندا 150 دەرەكتى اشكەرەلەدى، دەپ حابارلايدى قازاقپارات ءتىلشىسى.
«جەدەل ىزدەستىرۋ جۇمىستارى ناتيجەسىندە 45 كۇن ىشىندە مال ۇرلىعىنا قاتىستى 93 قىلمىس ءىزى سۋىماي اشىلدى. بۇعان دەيىن جاسالعان وزگەنىڭ مالىن قولدى ەتۋدىڭ 56 دەرەگىنىڭ ءمان-جايى انىقتالىپ، كۇدىكتىلەر ۇستالدى. ونىڭ 37 قىلمىسى «بۇرىنعى جىلدار» ساناتىنا جاتادى. قولدى بولعان مالدى ىزدەستىرۋ بارىسىندا پوليتسەيلەر 177 مالدى ءوز يەلەرىنە قايتاردى»، - دەپ مالىمدەدى وبلىستىق پوليتسيانىڭ باسپا ءسوز قىزمەتى.
سونىمەن قاتار، ءتارتىپ ساقشىلارى وبلىس اۋماعىندا مال جانە ەت ونىمدەرىن تاسىمالداۋعا تالاپتى كۇشەيتكەن. وبلىستاعى بارلىق اۆتوجولداردا بەكەتتەر ۇيىمداستىرىپ، ءىس-شارا كەزىندە 3300 كولىكتىڭ قۇجاتتارى تەكسەرىلىپ، مال تاسىمالداۋ ءتارتىبىن بۇزعان 440 تان استام جۇرگىزۋشى جاۋاپكەرشىلىككە تارتىلعان.
ءوز كەزەگىندە، ءتارتىپ ساقشىلارى مال يەلەرىنە ءوز مالدارىنا مۇقيات بولۋعا شاقىرادى. جايىلىمنان جوعالعان مالدى وزدەرى ىزدەپ، كوپ ۋاقىت جوعالتاتىنىن جانە ول مالدى جەدەل ىزدەستىرۋگە كەرى ىقپال ەتەتىنىن ەسكەرتەدى.