قازاقستان تەمىرجول ينفراقۇرىلىمىنىڭ ساپاسى جونىنەن 110 ەلدى ارتتا قالدىردى
بۇل جايىندا بۇگىن استانا ەكونوميكالىق فورۋمى اياسىندا وتكەن IV حالىقارالىق كولىكتىك- لوگيستيكالىق بيزنەس فورۋمىندا ق ر پرەمەر-ءمينيسترىنىڭ ءبىرىنشى ورىنباسارى اسقار مامين ءمالىم ەتتى، دەپ حابارلايدى قازاقپارات.
«قازاقستان ەۋرازيالىق كولىك جۇيەسىنىڭ كولىكتىك جەلىسىنە ىقپالداسۋ جۇمىستارىن قارقىندى جۇرگىزۋدە جانە ونىڭ دامۋىنا ايتارلىقتاي ۇلەس قوسىپ وتىر. سوڭعى 9 جىلدا قازاقستانداعى ينفراقۇرىلىمداردى، كولىك پەن لوگيستيكانى دامىتۋعا سالىنعان جالپى ينۆەستيتسيانىڭ كولەمى شامامەن 26 ميلليارد دوللاردى قۇرادى. مەملەكەت باسشىسىنىڭ «نۇرلى جول» باعدارلاماسىن «جىبەك جولى» ەكونوميكالىق بەلدەۋىمەن تۇيىندەستىرۋ باستاماسى ينۆەستيتسيا تارتۋعا جانە قازاقستان مەن قىتايدىڭ ينفراقۇرىلىمدىق جوبالارى بويىنشا ءىس-شارالاردى ۇيلەستىرۋگە مۇمكىندىك بەردى. بۇگىنگى كۇننىڭ وزىندە ءبىز ەلدەرىمىزدىڭ شەكاراسىندا 50 ميلليون توننادان استام جۇكتى وتكىزۋگە قابىلەتتى تەمىر جول لوگيستيكالىق ينفراقۇرىلىمىن قۇردىق. سوڭعى جىلدارى شامامەن 2,5 مىڭ شاقىرىم جاڭا تەمىرجول سالىندى»، - دەدى ءبىرىنشى ۆيتسە-پرەمەر.
ونىڭ ايتۋىنشا، بۇكىل الەمدىك ەكونوميكالىق فورۋمنىڭ مالىمەتتەرىنە سايكەس، قازاقستان تەمىرجول ينفراقۇرىلىمىنىڭ ساپاسى بويىنشا 2016-جىلدىڭ قورىتىندىسىندا 136 ەلدىڭ ىشىندە 26-ورىنعا تۇراقتادى.
ال لوگيستيكالىق قۇزىرەتتىلىك يندەكسى بويىنشا قازاقستان 77-ورىندا تۇر. «ءبىراق ءبىز 2020 جىلعا قاراي ۇزدىك 40 ەلدىڭ قاتارىنا قوسىلۋ ماقساتىن العا قويىپ وتىرمىز»، - دەدى اسقار مامين.
اۆتور: مارلان جيەمباي
