شىمكەنتتىڭ بيۋدجەتى تاۋەلسىزدىك جىلدارىندا 110 ەسەگە ارتقان
بۇل تۋرالى ايماقتىق كوممۋنيكاتسيالار قىزمەتىندە وتكەن بريفينگ بارىسىندا شىمكەنت قالاسىنىڭ اكىمى عابيدوللا ءابدىراحىموۆ ايتتى، دەپ حابارلايدى وڭتۇستىك قازاقستان وبلىسى اكىمدىگىنىڭ باسپا ءسوز قىزمەتى.
بريفينگ بارىسىندا شاحار باسشىسى قالانىڭ الەۋمەتتىك- ەكونوميكالىق دامۋ جاعدايى مەن شىمكەنتتىڭ تاۋەلسىزدىك جىلدارى قول جەتكىزگەن جەتىستىكتەرى تۋرالى ايتقان. قالا باسشىسىنىڭ مالىمەتىنە سۇيەنسەك، ەكونوميكا سالاسى بويىنشا قالا بيۋدجەتى 1994 -جىلى 1,0 ميلليارد تەڭگەنى قۇراسا، بۇگىندە 110,0 ميلليارد تەڭگەگە ارتقان. قالا ەكونوميكاسىنا سالىنعان ينۆەستيتسيالار 459,0 ميلليون تەڭگەدەن 200,0 ميلليارد تەڭگەگە وسكەن.
«ەگەمەندىگىمىزدىڭ العاشقى جىلدارى شىمكەنتتە 400 مىڭ حالىق بولسا، قازىر ولاردىڭ سانى 902 مىڭنان استى. قالا اۋماعى 13 مىڭ گەكتاردان 117 مىڭ گەكتارعا ۇلعايدى. 25 جىل ىشىندە 3 965,0 مىڭ شارشى مەتر جاڭا تۇرعىن ۇيلەر پايدالانۋعا بەرىلدى، - دەدى قالا اكىمى.
سونداي-اق ول سوزىندە بۇگىندە شىمكەنتتىڭ بيزنەس ءۇشىن وتە قولايلى قالاعا اينالعاندىعىن اتاپ ءوتتى. بۇگىندە قالا ايماعىندا 75 مىڭعا جۋىق كاسىپكەرلىك سۋبەكتىلەرى تىركەلىپ، وسى سالادا 136 مىڭ ادام جۇمىسپەن قامتىلعان.
