09:39, 09 - اقپان 2016 | GMT +5
وڭتۇستىك قازاقستاندا 110 جاسقا تولعان تۇرعىن ۇزاق ءومىر ءسۇرۋدىڭ قۇپياسىمەن ءبولىستى
استانا. قازاقپارات - سوزاق اۋدانىنىڭ اكىمى ماقسات يسايەۆ ەڭ قارت تۇرعىن بەيسەك رسىمبەتوۆتى 110 جاسقا تولعان تۋعان كۇنىمەن ارنايى بارىپ قۇتتىقتاپ، سىي-سياپات جاسادى.
بۇل تۋرالى و ق و اكىمىنىڭ باسپا ءسوز قىزمەتىنەن حابارلادى.
تەرىسكەيلىك ەڭ قارت اقساقال اكىم قۇتتىقتاۋىن ەرەكشە ىلتيپاتپەن قارسى الىپ، اۋدان باسشىسىنا باتاسىن بەردى.
«قارياسى بار ءۇيدىڭ قازىناسى بار دەگەن. ەلىمىزدە وزىڭىزدەي سۇيەگى اسىل، قازىنالى قاريالارىمىز كوپ بولىپ، جاسىڭىزدى ۇرپاقتارىڭىزعا بەرسىن. نەمەرە، شوبەرەلەرىڭىزدىڭ الدىندا امان-ەسەن جۇرە بەرىڭىز»، - دەدى اۋدان اكىمى.
كەزدەسۋ بارىسىندا تۋعان كۇن يەسى ۇزاق ءومىر ءسۇرۋىنىڭ قۇپياسى قازاقتىڭ ۇلتتىق سۋسىنى - قىمىراندى كوپ ءىشۋىنىڭ ارقاسىندا ەكەنىن ايتتى. زەينەتكەردىڭ بۇگىندە 32 نەمەرەسى مەن 22 شوبەرەسى بار.
