قازاقستان سپورتشىلارى ريو وليمپياداسىنىڭ 110 جولداماسىن ۇتىپ الۋدى جوسپارلاۋدا
«ءبىزدىڭ الدىمىزعا 27 سپورت ءتۇرى بويىنشا 110 وليمپيادا جولداماسىن ۇتىپ الۋ ماقساتى قويىلىپ وتىر. لوندون وليمپياداسىندا 105 جولداما بولعان ەدى. ارينە، بىزگە قارقىندى دامۋ كەرەك، بۇل ۇلتتىق قۇرامالارعا قويىلعان مەجە. بيىل بىزگە الەمدىك دەڭگەيدەگى ليسەنزيالىق جارىستاردا ەركىن كۇرەس، بوكس، جەڭىل اتلەتيكا، ءجۇزۋ، قايىقپەن ەسۋ، كانوەمەن ءجۇزۋ سىندى سپورت تۇرلەرىنەن كەمىندە 30 جولداما الۋ كەرەك. كەلەسى جىلى الەمنىڭ كونتينەنتالدى ليسەنزيالىق جارىستارىنا جانە 52 الەم كۋبوگى كەزەڭدەرىندە سپورتشىلار باقتارىن سىنايدى. ول جەردە سپورتشىلارىمىز جوسپارلانعان جولدامالاردىڭ قالعان بولىگىن الۋلارى تيىس. سوڭعى ليسەنزيالاردى 2016 - جىلدىڭ شىلدە ايىنا دەيىن الا الامىز»، - دەدى ە. قاناعاتوۆ.
قازىرگى ۋاقىتتا 4 سپورت ءتۇرى بويىنشا 7 جولداما بار. اۋىر اتلەتيكا قۇراماسى 10 جولدامانى الۋعا ءبىر قادام جاقىن. ەندى ونى الەم چەمپيوناتىندا دالەلدەۋلەرى ءتيىس. جالپى، ريو وليمپياداسىنا 120 دان استام ەلدىڭ سپورتشىلارى كەلەدى دەپ كۇتىلۋدە. وندا 42 سپورت ءتۇرى بويىنشا 306 مەدال جيىنتىعى ساراپقا سالىنادى.
«ءبىز اۋىر اتلەتيكا، بوكستان ەرلەر جانە قىزدار قۇراماسىنان ءۇمىت كۇتىپ وتىرمىز. كۇرەس تۇرلەرىنەن، دزيۋدودان دا مەدال الۋ جوسپارلارى جوق ەمەس. جەڭىل اتلەتيكادا جاقىندا جولداما جەڭىپ العان ولگا رىپاكوۆ بار. ءبىزدىڭ ەلدە جۇزۋدەن جوعارى دەڭگەيدەگى سپورتشىلاردىڭ بولماعانىنا كوپ بولدى. جاقىندا بالاندين دەگەن سپورتشىمىز شىقتى. بۇگىندە ول الەمدىك رەيتينگتە ءۇشىنشى ورىندا تۇر. ول مىندەتتى تۇردە وليمپيادا مەدالىن الادى دەپ وتىرعانىمىز جوق، دەگەنمەن ونىڭ شاماسى جەتەدى»، - دەپ اتاپ ءوتتى ول.
اۆتور: جاسۇلان جولدىبايەۆ