قىتاي شىنجاڭدا سۋ شارۋاشىلىعىن دامىتۋعا 11,8 ميلليارد دوللار جۇمسادى
ش ۇ ا و حالىقتىق ۇكىمەت باسشىسى شوۆرات زاكەر ۇرىمجىدە 25- شىلدە كۇنى شىنجاڭدا سۋ شارۋاشىلىعى كەشەنىن دامىتۋعا كومەك كورسەتۋ جونىندە وتكەن جينالىستا 12- بەس جىلدىقتا وسى سالاعا قۇيعان ينۆەستيتسيا كولەمى 11,8 ميلليارد دوللار بولعانىن ايتتى. ونىڭ 5,1 ميللياردى ورتالىق بيۋدجەتتەن، قالعانى جەرگىلىكتى بيۋدجەتتەن الىنعان. وسى باعدارلامانىڭ ارقاسىندا 3,6 ميلليون فەرمەر مەن مال شارۋاشىلىعى نىساندارىن تازا سۋمەن قامتاماسىز ەتۋ مۇمكىن بولعان.
قىتايدىڭ سۋ شارۋاشىلىعى ءمينيسترى چەن لەيدىڭ ايتۋىنشا، وسى كەزەڭ دە، الداعى كەزەڭ دە ش ۇ ا و- دە سۋ شارۋاشىلىعى كەشەندەرىن دامىتۋدا زور سەرپىلىس جاساۋ ءۇشىن وتە ماڭىزدى. 13- بەسجىلدىق اياسىندا شىڭجاڭ ولكەسىن سۋمەن قامتۋ، سۋ قاۋپى جايلى ەسكەرتۋ، گيدروتەحنيكالىق نىساندار قاۋىپسىزدىگىن قامتاماسىز ەتۋ، سونداي-اق سۋ كوزدەرىن رەابيليتاتسيادان وتكىزۋ مەن قالپىنا كەلتىرۋ سىندى ماسەلەلەر شەشىمىن تاپپاق.
ەسكە سالا كەتەيىك، ەرتىس جانە ىلە وزەندەرى سىندى ماڭىزدى تۇشى سۋ كوزدەرى قىتايدىڭ شىنجاڭ ۇيعىر اۆتونوميالىق ولكەسىنەن باستاۋ الادى. سونىمەن قاتار، ش ۇ ا و ەكونوميكاسىنىڭ قارقىندى وسۋىنە جانە قازاقستانمەن شەكارالاس ايماقتاردا جان سانىنىڭ كوبەيۋىنە بايلانىستى سۋعا تۇرمىستىق قاجەتتىلىك ارتىپ وتىر.
