اپتاپ ىستىق: 11 ادام قازا تاۋىپ، 5 مىڭنان استامى اۋرۋحانادا جاتىر

توكيو. Kyodo-قازاقپارات - جاپونياداعى اپتاپ ىستىقتان 11 ادام قازا تاۋىپ، 5664 تۇرعىن اۋرۋحاناعا جەتكىزىلدى، دەپ حابارلايدى قازاقپارات Kyodo اگەنتتىگىنە سىلتەمە جاساپ.

جاپونيا جاڭالىقتار اگەنتتىگىنىڭ دەرەگى بويىنشا، ەلدەگى تەمپەراتۋرا جاڭبىر ماۋسىمىنىڭ اياقتالۋىنا بايلانىستى بىردەن كوتەرىلگەن.

وتكەن اپتاداعى ناۋقاستار سانىمەن سالىستىرعاندا، ىستىقتان زارداپ شەككەندەر سانى ءۇش ەسە وسكەن. ءورت پەن تابيعي اپاتقا قارسى كۇرەس اگەنتتىگىنىڭ دەرەگىنە سايكەس، ىستىقتان زارداپ شەككەندەردىڭ 52,6 پروتسەنتى - 65 جاستاعى جانە ودان ۇلكەن ادامدار.

اۋرۋحانادا جاتقانداردىڭ ىشىندە 119 ناۋقاس، دارىگەرلەردىڭ ايتۋىنشا، كەم دەگەندە 3 اپتا ەمدەۋ مەكەمەسىندە جاتۋى كەرەك. تاعى 1792 ادامنىڭ جاعدايى اۋىر.

جاپونيانىڭ 11 پرەفەكتۋراسىندا 11 ادام قازا تاپتى. ايتي پرەفەكتۋراسىندا ەڭ كوپ ادام – 392، وساكا مەن توكيودا تيىسىنشە 388 جانە 299 ادام اۋرۋحاناعا جاتقىزىلعان.

سينوپتيكتەردىڭ دەرەگىنشە، كەلەسى اپتادا جاپونيادا اۋا تەمپەراتۋراسى ورتاشا كورسەتكىشتەن جوعارى بولادى.