وتكەن 11 ايدا ەلىمىزدە جول-كولىك وقيعالارىنان 2 مىڭنان استام ادام قازا تاپتى
استانا. قازاقپارات - قازاقستاندا اعىمداعى جىلدىڭ 11 ايىندا جول-كولىك وقيعالارىنان 2 مىڭ 235 ادام قازا تاپتى.
بۇگىن ءماجىلىستىڭ جالپى وتىرىسىندا دەپۋتاتتار ساۋالىنا جاۋاپ بەرگەن ق ر ىشكى ىستەر ءمينيسترى قالمۇحانبەت قاسىموۆ وسىلاي ءمالىم ەتتى.
ءمينيستردىڭ مالىمەتىنە قاراعاندا، 2015 -جىلدىڭ وتكەن 11 ايىندا قازاقستاندا 17283 جول- كولىك وقيعاسى تىركەلىپ، ونىڭ سالدارىنان قازا بولعاندار سانى 2235 ادامدى قۇراعان. سونىمەن قاتار جول اپاتىنان 22 مىڭنان استام ادام جاراقات العان.
«بۇل كورسەتكىشتەر بىلتىرعى جول-كولىك وقيعالارىنا قاراعاندا 6,7 پايىزعا تومەن، ال قازا بولعاندار سانى 5,7 پايىزعا، جاراقات العاندار سانى 6,2 پايىزعا از. قولدانىستاعى زاڭ قابىلدانعاننان سوڭ، 2014 -جىلى جولداعى كولىك اپاتتارى ءبىرشاما ازايدى. ناتيجەسىندە قازا تاپقاندار مەن جاراقات العاندار كورسەتكىشى دە تومەندەپ وتىر. ياعني، زاڭ ءوز ناتيجەسىن بەرۋدە، جولداعى احۋالعا وڭ سەپتىگىن تيگىزىپ جاتىر»، - دەيدى مينيستر قاسىموۆ.
ونىڭ پايىمىنشا، قازىرگى ۋاقىتتا جول-كولىك وقيعالارى نەگىزىنەن اۆتوكولىكتەر سانىنىڭ ارتۋىنا بايلانىستى ورىن الىپ وتىر.
«قازىرگى تاڭدا ەلىمىزدە 4 ميلليون 483 مىڭ اۆتوكولىك بار، بۇل رەتتە كولىك قۇرالدارىنىڭ سانى سوڭعى 7-8 ايدا 400 مىڭعا ارتقان. ەكىنشىدەن، قولدانىستاعى اۆتوكولىكتەردىڭ 20 پايىزىنىڭ توزىعى جەتكەن»، - دەدى مينيستر.
اۆتور: قانات مامەتقازى ۇلى
