قازاقستاندا 11-13- مامىر ارالىعىندا قاتتى جاڭبىر جاۋىپ، كۇن سۋىتادى

استانا. قازاقپارات – 11- مامىردا قازاقستاندا جاڭبىر جاۋىپ، كۇن سۋىتادى. رەسپۋبليكا بويىنشا جەل كۇشەيىپ، وڭتۇستىك وڭىرلەردە شاڭدى داۋىل سوعادى، دەپ حابارلايدى قازاقپارات «قازگيدرومەت» ر م ك- عا سىلتەمە جاساپ.

سينوپتيكتەردىڭ بولجامى بويىنشا، قازاقستاننىڭ باسىم بولىگىندە اۋا رايى وڭتۇستىك تسيكلوننىڭ ىقپالىندا بولادى، سوعان بايلانىستى جاڭبىر جاۋىپ، كۇن كۇركىرەيدى جانە بۇرشاق جاۋۋى مۇمكىن. 11-12- مامىردا باتىستا، 12-13- مامىردا - سولتۇستىك-باتىستا، سولتۇستىكتە، 13- مامىردا - ورتالىقتا جانە شىعىستا قاتتى جاڭبىر جاۋادى. رەسپۋبليكا بويىنشا جەل كۇشەيىپ، وڭتۇستىك وڭىرلەردە شاڭدى داۋىل سوعادى.

رەسپۋبليكا بويىنشا اۋا تەمپەراتۋراسى تومەندەيدى. سولتۇستىك جانە شىعىس وڭىرلەردە تۇندە 2 گرادۋسقا دەيىن ۇسىك جۇرەدى. كۇندىزگى ۋاقىتتا تەمپەراتۋرا سولتۇستىك-باتىستا جانە سولتۇستىكتە 5-15- گرادۋس جىلى بولادى.