ەمحاناعا تىركەلۋ: مەديتسينالىق ساقتاندىرۋ قورى ءجيى قويىلاتىن 10 سۇراققا جاۋاپ بەردى

ەلىمىزدە ەمحاناعا بەكىتىلۋ ناۋقانى جىل سايىن 15- قىركۇيەك پەن 15- قاراشا ارالىعىندا جۇرگىزىلەدى. بۇل جايىندا الەۋمەتتىك مەديتسينالىق ساقتاندىرۋ قورىنان ءمالىم ەتتى، دەپ حابارلايدى قازاقپارات ءتىلشىسى.

وسىعان وراي قور باسپا ءسوز قىزمەتى مەديتسينالىق-سانيتاريالىق العاشقى كومەك ۇيىمدارىنا تىركەلۋ ناۋقانىنا قاتىستى ەڭ وزەكتى ساۋالدارعا جاۋاپ بەردى.

ەمحاناعا تىركەلۋگە ءوتىنىش قاي ۋاقىت ىشىندە قارالادى؟

ەلەكتروندىق ۇكىمەت پورتالى ارقىلى تىركەلۋگە ءوتىنىم بەرىلگەن جاعدايدا، تىركەلۋ (نەمەسە تىركەۋدەن دالەلدى باس تارتۋ) 1 جۇمىس كۇنى ىشىندە جۇزەگە اسىرىلادى.

ەگەر تىركەۋ ناۋقانى كەزىندە باسقا ەمحاناعا تىركەلۋگە ءوتىنىش بەرىلسە، پاتسيەنت سول جەردەن قاي ۋاقىتتا مەديتسينالىق كومەك الا الادى؟

تىركەۋ ناۋقانى 15- قىركۇيەك پەن 15- قاراشا ارالىعىندا جۇرگىزىلەدى جانە ونىڭ ناتيجەلەرى كەلەسى جىلدىڭ 1- قاڭتارىنان باستاپ كۇشىنە ەنەدى. ياعني، باسقا ەمحانادا (وسى ەمحانا ونى تىركەۋگە ءوتىنىمىن راستاعان جاعدايدا) پاتسيەنت جاڭا جىلدىڭ باسىنان باستاپ مەديتسينالىق كومەك الا الادى. باسقا ەمحاناعا تىركەلگەن كەزدە بۇرىنعى ەمحانادان اۆتوماتتى تۇردە تىركەۋدەن شىعارۋ جۇرگىزىلەدى.

ەمحاناعا كىم تىركەلە الادى؟

قازاقستان اۋماعىندا تۇراقتى تۇراتىن (تۇرۋعا ىقتيارحاتى بار) ق ر ازاماتتارى، شەتەلدىكتەر جانە ازاماتتىعى جوق ادامدار ەمحاناعا تىركەلە الادى. ازاماتتاردىڭ بۇل ساناتى تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) اياسىندا جانە م ءا م س جۇيەسىندە قىزمەتتەر الۋعا قۇقىلى.

ق ر اۋماعىندا ۋاقىتشا بولاتىن ەڭبەك ميگرانتتارى مەن ولاردىڭ وتباسى مۇشەلەرى دە ەمحاناعا تىركەلە الادى. ولار – ە ا ە و- عا قاتىسۋشى ەلدەردىڭ (رەسەي، بەلارۋس، قىرعىزستان، ارمەنيا) ازاماتتارى. ول ءۇشىن ولارعا ەرىكتى مەديتسينالىق ساقتاندىرۋ (ە م س) شارتى (پوليس) نەمەسە مەديتسينالىق-سانيتاريالىق العاشقى كومەكتى (م س ا ك) جانە ستاتسيونارلىق كومەكتى جابۋعا ەسەپتەلگەن مەديتسينالىق ساقتاندىرۋ (ج م س) بولۋى كەرەك. م س ا ك- تاعى ە م س نەمەسە ج م س شارتتارىنىڭ نەگىزىندە ەمحاناعا بەكىتىلىپ، ت م ك ك ك- عا كىرەتىن مەديتسينالىق كومەك الۋعا بولادى. بۇل رەتتە ەڭبەك ميگرانتتارى مەن ولاردىڭ وتباسى مۇشەلەرى م س ا ك- قا ە م س نەمەسە ج م س شارتتارىنسىز م ءا م س- كە كىرەتىن مەديتسينالىق كومەكتى الا المايدى.

بارلىق ازامات سول جەردە قىزمەت كورسەتۋدى جالعاستىرۋ ءۇشىن ءوز ەمحاناسىنا قايتا تىركەلۋگە ءوتىنىش بەرۋى كەرەك پە؟

جوق، تىركەلگەن حالىق ءوز ەمحاناسىندا مەديتسينالىق كومەك الۋدى جالعاستىرادى. ەگەر ازاماتتار ءتيىستى ءوتىنىم بەرمەسە، بۇرىنعى مەديتسينالىق ۇيىمدارىنا تىركەلگەن كۇيىندە قالادى.

ءبىر وتباسىنىڭ مۇشەلەرى ءبىر ۋچاسكەلىك دارىگەرگە تىركەلۋى كەرەك پە؟

مەديتسينالىق-سانيتاريالىق العاشقى كومەك كورسەتۋ وتباسىلىق باقىلاۋ قاعيداتىنا نەگىزدەلگەن. دارىگەرگە وسى وتباسى مۇشەلەرىنىڭ سالاماتتى ءومىر سالتىن ۇستانۋىن قالىپتاستىرۋ، مۇمكىن بولاتىن اۋرۋلاردىڭ پروفيلاكتيكاسى جانە ەمدەۋ وڭايىراق بولادى. مەديتسينالىق كومەك كورسەتۋدەگى بۇل ءتاسىل ونىڭ ساپاسىن ەداۋىر جاقسارتۋعا مۇمكىندىك بەرەدى.

جاقىن جەردە ورنالاسقان ەمحانادان الىس ەمحانانى تاڭداۋعا بولا ما؟

مەديتسينالىق-سانيتاريالىق العاشقى كومەك (م س ا ك) كورسەتۋدىڭ نەگىزگى قاعيداتى اۋماقتىق قولجەتىمدىلىك بولعاندىقتان، پاتسيەنتتەرگە قادامدىق قولجەتىمدىلىكتىڭ شەگىندە (15-20 مينۋت جاياۋ ءجۇرۋ) ەمحانالارعا تىركەلۋ ۇسىنىلادى. مۇنداعى ارتىقشىلىق ۇيدە مەديتسينالىق كومەك الۋ مۇمكىندىگى بولادى.

جالپى، ەمحانانى تۇرعىلىقتى جەرى بويىنشا ەمەس (ءبىراق تۇرعىلىقتى جەرى نەمەسە قالا اۋدانى شەگىندە) تاڭداۋعا بولادى. سوندىقتان جاقىن جەردە ورنالاسقان ەمحاناعا تىركەلۋ ۇسىنىلادى.

ءبىر ۋاقىتتا بىرنەشە ەمحاناعا تىركەلۋگە بولا ما؟

جوق. تىركەلۋ جەكە سايكەستەندىرۋ ءنومىرى (ج س ن) بويىنشا جۇزەگە اسىرىلاتىندىقتان، ازاماتتار تەك ءبىر ەمحاناعا تىركەلە الادى. بۇل رەتتە بۇرىنعى ەمحانادان شىعارۋ اۆتوماتتى تۇردە جۇرگىزىلدى.

قانداي سەبەپتەر بويىنشا ەمحاناعا تىركەلۋگە ءوتىنىم قابىلدانباۋى مۇمكىن؟

تىركەۋدەن باس تارتۋدىڭ بىرنەشە سەبەبى بار:

- دۇرىس ەمەس قۇجاتتار ۇسىنىلدى؛

- پاتسيەنت باسقا قالادا (كەنتتە، اۋىلدا) تۇرادى؛

- بۇل ەمحانادا بارلىق ۋچاسكەلەردە تىركەلگەن حالىقتىڭ ەڭ كوپ سانى اسىپ ءتۇستى؛

- تىركەۋگە ءتيىستى بالانىڭ مۇددەلەرىن بىلدىرۋگە زاڭدى قۇقىعىن راستايتىن قۇجاتتار بولماعان جاعدايدا.

نورماتيۆتىك قۇجاتتارعا سايكەس، تىركەلگەن حالىقتىڭ ەڭ كوپ سانى مىنادان اسپاۋى كەرەك:

• ءبىر جالپى پراكتيكا دارىگەرىنە - ارالاس حالىقتىڭ 1700 ادامى (ەرەسەكتەر مەن بالالار)؛

• ۋچاسكەلىك تەراپيەۆت-2200 ەرەسەك ادام؛

• ۋچاسكەلىك پەدياتر-0 دەن 6 جاسقا دەيىنگى 500 بالا، 0 دەن 14 جاسقا دەيىنگى 900 بالا.

تىركەۋ ناۋقانىنا قانشا ەمحانا قاتىسادى؟

تىركەۋ ناۋقانىنا بارلىعى 624 مساك وبەكتىسى قاتىسادى، وندا 13 مىڭعا جۋىق ۋچاسكە جۇمىس ىستەيدى. سالىستىرۋ ءۇشىن، 2021-جىلى تىركەۋ ناۋقانى بويىنشا مەديتسينالىق-سانيتاريالىق العاشقى كومەك 521 مەديتسينالىق ۇيىمدا قول جەتىمدى بولدى. جىل سايىن امبۋلاتوريالىق- ەمحانالىق كومەك كورسەتۋشىلەردىڭ سانى ارتىپ كەلەدى. بۇل حالىققا قادامدىق قولجەتىمدىلىكتە مەديتسينالىق كومەك كورسەتۋگە مۇمكىندىك بەرەدى.

تاعى قانداي سەبەپتەرمەن ەمحانانى اۋىستىرۋعا بولادى؟

تىركەۋ ناۋقانى ەمحانانى اۋىستىرۋدىڭ جالعىز مۇمكىندىگى ەمەس ەكەنىن ەستەرىڭىزگە سالا كەتەيىك. مۇنى جىلىنا ءبىر رەت ەركىن تاڭداۋ قۇقىعىمەن جاساۋعا بولادى. سونداي-اق ەگەر ادام تۇراقتى نەمەسە ۋاقىتشا تۇراتىن، جۇمىس ىستەيتىن نەمەسە وقيتىن جەرىن اۋىستىرسا، باسقا ەلدى مەكەنگە كوشسە نەمەسە ول ورنالاسقان ەمحانا قايتا ۇيىمداستىرىلعان نەمەسە جويىلعان بولسا ەمحانا اۋىستىرا الادى.