الماتىلىق دارىگەرلەر جۇرەگى ەكى رەت توقتاپ قالعان 10 جاسار بالانى امان الىپ قالدى

None
الماتى. قازاقپارات- الماتى بالالار جەدەل مەديتسينالىق جاردەم ورتالىعىنىڭ دارىگەرلەرى پيون سپيرت تۇنباسىن ءىشىپ العان بالانى امان الىپ قالدى، دەپ حابارلايدى قازاقپارات ءتىلشىسى.

بالالار جەدەل مەديتسينالىق جاردەم ورتالىعى باسپا ءسوز قىزمەتىنىڭ مالىمەتىنشە، 10 جاسار داستان تاۋشىمىلدىق (پيون) سپيرت تۇنباسىن سۋمەن شاتاستىرىپ ءىشىپ قويعان.

ءبىراز ۋاقىتتان كەيىن بالانىڭ دەنساۋلىعى ناشارلاپ، ەسىنەن تانىپ قالعان. جەدەل جاردەم بريگاداسى ناۋقاستى الماتى بالالار جەدەل مەديتسينالىق جاردەم ورتالىعىنا جەتكىزدى.

بالانىڭ جاقىندارى ونىڭ سول تۇنبانى ىشكەنىن بىلمەگەندىكتەن، بالا تاعامنان ۋلانعان دەپ بولجاپ، ناقتى دياگنوز قويۋ قيىنعا سوققان. داستان بۇرىن ەشقاشان ءدارى- دارمەك پەن تاعام اللەرگياسىنان زارداپ شەكپەگەن.

«بىزگە بالا III دارەجەلى ەكزوۋىتتى شوك سالدارىنان وتە اۋىر جاعدايدا ءتۇستى، بالادا قانداعى گليۋكوزانىڭ جوعارىلاۋى (18 ممول/ل دەيىن) ، گيپەرگليكەميا، كەتواتسيدوز، باس مي ءىسىنۋى، جالپى ينتوكسيكاتسيا بەلگىلەرى بايقالدى. ساناسى كومادا بولدى. قابىلداۋ ءبولىمىنىڭ جاعدايىندا ناۋقاستى كوپبەيىندى دارىگەرلەر بريگاداسى تەكسەرىپ، شۇعىل تۇردە كلينيكالىق جانە زەرتحانالىق زەرتتەۋلەر جۇرگىزىلدى.

تاۋشىمىلدىق تۇنباسىمەن جەدەل ۋلانۋ. اۋىر دارەجە. 3-دارەجەلى ەكزوۋىتتى شوك. ۋىتتى ەنتسەفالوپاتيا. ۋىتتى گەپاتيت. ناۋقاس جانساقتاۋ بولىمىنە جاتقىزىلدى، وندا وعان جەكە دارىگەرلىك جانە مەدبيكەلىك پوست تاعايىندالدى. جاعدايىنىڭ اۋىرلىعىنا بايلانىستى ناۋقاستىڭ جۇرەگى ەكى رەت توقتاپ قالعان. ر ق ت ب قىزمەتكەرلەرى بالانى رەانيماتسيالاپ، جاعدايىن تۇراقتاندىرۋعا قول جەتكىزدى»، - دەيدى الماتى بالالار جادەل مەديتسينالىق جاردەم ورتالىعىنىڭ توكسيكولوگيا ءبولىمىنىڭ مەڭگەرۋشىسى حۋرمەتبەك توحتار.

داستانىڭ اناسى بالاسىن امان الىپ قالعان دارىگەرلەرگە العىسىن ايتتى.

«10-بولىمشەنىڭ مەديتسينا قىزمەتكەرلەرىنە، اسىرەسە حۋرمەتبەك توحتار ۇلىنا، م. گ. ماقۇلبەكوۆ، ت. م. بيدايباي، ا. ز. ريگي، ا. كۋليمبەتوۆ، نيەۆروپاتولوگ ن. ن. قۇرمانبايەۆقا ۇلىم ءۇشىن العىس بىلدىرەمىن. جانكەشتى ەڭبەكتىڭ، جوعارى كاسىبيلىكتىڭ، قايىرىمدىلىقتىڭ، ساپالى مەديتسينالىق كومەك كورسەتۋگە دەگەن ۇمتىلىستىڭ ارقاسىندا ۇلىم امان قالدى. جۇرەگى ەكى رەت توقتاپ قالدى، ءبىر تاۋلىكتەن استام ۋاقىت كومادا بولدى، جاساندى تىنىس الۋ اپپاراتىنا قوسىلدى. مىنە، ەندى ءبىز ەش پاتولوگياسىز دەرلىك ۇيگە شىققالى جاتىرمىز، دەنساۋلىعىمىز جاقسى، بارلىق اناليزدەر جاقسى ناتيجە بەردى. كاسىبي مامانداردى تاڭداپ، جۇمىستى جاقسى ۇيىمداستىرعانى بالالار جەدەل مەديتسينالىق جاردەم ورتالىعىنىڭ بۇكىل ۇجىمىنا كوپ راحمەت»، - دەپ راحمەت ايتتى داستاننىڭ اناسى.

ءوز كەزەگىندە دارىگەرلەر ازىق- تۇلىك قاۋىپسىزدىگى شارالارىن قاتاڭ ساقتاۋدى، ءدارى- دارمەك پەن بالا دەنساۋلىعىنا قاۋىپتى زاتتاردى ولاردىڭ قولى جەتپەيتىن جەردە ساقتاۋعا شاقىردى.

جاز - كونسەرۆى مەن مارينادتى دايىنداۋ ماۋسىمى، بۇل كەزدە سىركە سۋى جانە باسقا قاۋىپتى زاتتارمەن ۋلانۋ ىقتيمالدىعى ايتارلىقتاي ارتا تۇسەتىنىڭ ەسكە سالدى.

سوڭعى جاڭالىقتار