اكىمگە ءسوزى وتكەن بالا: وسكەمەن قالاسىنىڭ اكىمى 10 جاستاعى تۇرعىننىڭ ءوتىنىشىن ورىندادى

استانا. قازاقپارات - جاقىندا وسكەمەندەگى اۋلالاردىڭ ءبىرى جاڭارتىلدى.

بۇل باستاماعا مۇرىندىق بولىپ، شەنەۋنىكتەرگە قوزعاۋ سالعان - دوسجان دۋلات ۇلى ەسىمدى بالاقاي.

قالا اكىمدىگىنىڭ باسپا ءسوز قىزمەتى مالىمەتىنشە، 10 جاستاعى تۇرعىن ءوتىنىشىن «ارقالاپ»، قالا باسشىسى جاقسىلىق ومارعا بەينەۇندەۋ جولداعان. ول اۋلاسى توزىپ، شىرايى كەتكەنىن ايتقان. ال جاۋاپتى تۇلعا وسى مەكەنجايعا بارىپ، جاعدايمەن تانىسقان. اكىم دوسجانعا اۋلاسى ءۇشىن باس قاتىرىپ، ماسەلەنى قاز-قالپى جەتكىزگەنىنە العىسىن بىلدىرگەن.

«اكىم ويىن الاڭىن اباتتاندىرىپ، «مەنىڭ اۋلام» وبلىستىق باعدارلاماسى اياسىندا ۇنەمدەلگەن قارجىعا ءتيىستى جۇمىس اتقارىلاتىنىن جەتكىزدى. ماسەلەنى وسىلاي شەشۋدەن بولەك، اكىمدىك بيۋدجەتتەن تىس قاراجات تارتۋ جاعىن قاراستىردى. ناتيجەسىندە دەمەۋشىلەر قارجىسى ەسەبىنەن جاڭادان ويىن الاڭى ورناتىلدى»، - دەلىنگەن قالا اكىمدىگى مالىمەتىندە.

جاقسىلىق ومار جۇمىس بىتكەن سوڭ اۋلاعا ارنايى بارعان. بالالارمەن، ولاردىڭ اتا-انالارىمەن اڭگىمە بارىسىندا بارلىق تۇرعىندى كوپقاباتتى ءۇي ماڭىن كۇتىپ ۇستاۋعا شاقىردى.