قانداي شەتەلدىكتەر قازاقستاندا يمميگرانت ۆيزاسىن جانە 10 جىل تۇرۋعا رۇقسات الا الادى
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ايتىپ بەردى، دەپ حابارلايدى قازاقپارات ءتىلشىسى.
«مەملەكەت باسشىسى ۇكىمەتتىڭ كەڭەيتىلگەن وتىرىسىندا شەتەلدەن بيزنەس ينۆەستيتسيالاردى تارتۋ ماسەلەسىن كوتەردى. وسى ورايدا پرەزيدەنت تاپسىرماسىنا سايكەس، شەتەلدىك بيزنەس ينۆەستيتسياسىن كوبىرەك تارتۋ ماقساتىندا، پروتسەستى جەڭىلدەتۋ جاعى قارالىپ جاتىر. ناقتىراق ايتقاندا، قازاقستان ەكونوميكاسىنا 300 مىڭ دوللاردان ارتىق ينۆەستيتسيا قۇيعان شەتەل ازاماتتارىنا جاڭا ياعني يمميگرانت ۆيزاسىن بەرۋ»، - دەدى ءىلياس يسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، يمميگرانت ۆيزاسىن العان شەتەلدىكتەرگە ەلىمىزدە 10 جىلعا دەيىن تۇرۋعا ىقتيار حات بەرۋ جاعى دا قارالىپ جاتىر.
«بىزدە شەتەل ازاماتتارىنا ينۆەستيتسيالىق ۆيزا بەرۋدىڭ مۇمكىندىگى مول. سەبەبى ولار ەلىمىزدە جاڭا جۇمىس ورىندارىن اشادى جانە قازىناعا سالىق تولەيدى»، - دەيدى ول.
بۇعان دەيىن ەڭبەك مينيسترلىگىنىڭ وكىلى ەلىمىزگە شەتەلدىك جۇمىس كۇشىن تارتۋ جاعدايىمەن تانىستىرعان ەدى.
1- ساۋىردەگى دەرەككە سايكەس ەلىمىزدە 14417 شەتەل ازاماتى جۇمىس ىستەپ جاتىر.
