شىمكەنتتىك دارىگەرلەر 10 جاسار بالانىڭ ميىنان ءبىر ۋىس قۇرت الدى

شىمكەنت. قازاقپارات - شىمكەنتتىك دارىگەرلەر 10 جاسار بالانىڭ ميىنان ءبىر ۋىس قۇرت الدى، دەپ حابارلايدى قازاقپارات ءتىلشىسى.

شىمكەنت قالالىق كلينيكالىق بالالار اۋرۋحاناسىنىڭ دارىگەرلەرى 10 جاستاعى بالاعا وتا جاساپ، ميىنداعى ەحيناكوكك كيستاسىن حيرۋرگيالىق جولمەن الىپ تاستادى.

ەكى ساعاتقا سوزىلعان وپەراتسيادان كەيىن ناۋقاس ەكى تاۋلىك بويى رەانيماتسيادا جاتقان.

كەيىن پالاتاعا اۋىستىرىلىپ، ەم-دوم جاسالدى. ال، ءبىر اپتادان سوڭ ۇيىنە شىعارىلعان.

«ءساۋىر ايىندا باس اۋرۋىنا شاعىمدانعان 10 جاسار بالا قالالىق بالالار كلينيكالىق اۋرۋحاناسىنا كەلگەن. جوسپارلى تۇردە بالاعا وتا جاسالىپ، قۇرت ءتارىزدى ەحيناكوكك كيستاسى الىندى. قازىر جەرگىلىكتى ەمحاناداعى دارىگەرلەردىڭ باقىلاۋىندا. جاعدايى جاقسى. ميداعى ەحيناكوكك قۇرتى - سيرەك كەزدەسەتىن جاعداي. كوبىنە مۇنداي قۇرت تارىزدەس كيستا باۋىر مەن وكپەدە كەزدەسەدى»، - دەيدى شىمكەنت قالالىق كلينيكالىق بالالار اۋرۋحاناسىنىڭ دارىگەر-نەيروحيرۋرگى سامات كوكشيكبايەۆ.