كۇنىنە ءبىر قوراپ تەمەكى شەگەتىن ادام 10 جىلدا قانشا تەڭگە جۇمسايدى
الماتى قالالىق پسيحيكالىق دەنساۋلىق ورتالىعىنىڭ ديرەكتورى ساپار راحمەنشەيەۆتىڭ ايتۋىنشا، وسىدان بىرنەشە جىل بۇرىن شىلىمعا قۇمار ازامات جۇرەك سىرقاتىمەن اۋرۋحاناعا تۇسكەن.
دارىگەرلەر وعان دەنساۋلىعىنا قاۋىپتى ادەتتەن باس تارتپاسا، جۇرەك قان تامىرلارى اۋرۋى اسقىنىپ، ودان امان قالۋى ەكىتالاي ەكەنىن ەسكەرتتى.
«الماتى تۇرعىنى 40 جىلدان كەيىن تەمەكىگە تاۋەلدىلىكتەن قۇتىلدى. 8 جىلدان بەرى تەمەكىنى اۋزىنا المايدى. قازىر دەنساۋلىعى جاقسى. تاۋەلدىلىكتەن ارىلۋ وڭاي ەمەس. دەگەنمەن، ەمى بار. مۇنداي كەزدە ءدارى- دارمەك تاعايىندايمىز. ورتالىقتا تۇرعىندارعا پسيحولوگيالىق، پسيحوتەراپيالىق كومەك كورسەتىلەدى. ەڭ باستىسى شىلىمعا قۇمار ازاماتتىڭ «باس تارتامىن» دەگەن نيەتى بولۋ كەرەك. ەگەر ەمدەلۋشىنىڭ تەمەكىدەن باس تارتۋعا نيەتى بولماسا، ەمنىڭ پايداسى بولمايدى»، - دەيدى ورتالىق ديرەكتورى ساپار راحمەنشەيەۆ.
سونىمەن قاتار، دارىگەر تەمەكى مەن ناسىبايدىڭ قۇرامىنداعى زياندى زاتتاردىڭ ەشقانداي ايىرماشىلىعى جوق ەكەنىن اتاپ ءوتتى.
«كوبىنەسە كوك تۇتىنگە تاۋەلدى جاندار ناسىبايدى تۇتىنىپ، شىلىم شەگۋدەن قۇتىلدىم دەپ ويلايدى. وكىنىشكە قاراي ولاردىڭ قۇرامىنداعى زياندى زاتتاردىڭ ەشقانداي ايىرماشىلىعى جوق. شىلىم شەككەندە نيكوتين قانعا وكپە ارقىلى تاراپ، اعزانى ۋلايدى. وكپە تازارادى دەگەن مالىمەت جالعان. ناسىباي اتقاندا زياندى زاتتار اۋىز قۋىسىنىڭ قان تامىرلارى ارقىلى قانعا ءتۇسىپ، اۋىز قۋىسىنىڭ، وكپەنىڭ، اسقازاننىڭ قاتەرلى ىسىگىنىڭ پايدا بولۋى مۇمكىن. ويتكەنى ناسىبايدىڭ قۇرامىندا تاۋىقتىڭ قيى، اكتىڭ سۋى، سەكسەۋىلدىڭ كۇلى، قارااعاشتىڭ شايىرى ، تەمەكىنىڭ جاپىراعى بار. ناسىباي اتقان ادام دا نيكوتينگە تاۋەلدىلىكتەن زارداپ شەگەدى. قازىرگى تاڭدا سانگە اينالعان ەلەكتروندى تەمەكى دە قاۋىپتى»، - دەيدى مامان.
شىلىمقۇمارلار ون جىلدا تەمەكىگە 2,7 ميلليون تەڭگە شىعىندايدى.
«تەمەكى شەگۋ اعزانى ازدىرىپ، مي قىزمەتىن السىرەتىپ، ەرتە قارتايۋ ۇدەرىسىن جەدەلدەتۋگە اسەر ەتەتىن ۋلى ءتۇتىن. شىلىمقورلاردىڭ وتباسىلىق بيۋدجەتىنە اكەلەتىن شىعىنى دا قوماقتى. ەلىمىزدە ءبىر قوراپتىڭ ورتاشا باعاسى - 750 تەڭگە. نيكوتينگە تاۋەلدى ادام كۇنىنە ءبىر قوراپتى تاۋىسىپ، ايىنا 22500، جىلىنا 270000 تەڭگە كوك تۇتىنگە جۇمسايدى. ال ون جىلدا 2,7 ميلليون تەڭگە شىعىندايدى»، - دەپ اتاپ ءوتتى ساپار راحمەنشەيەۆ.
