ورازانىڭ سوڭعى 10 كۇنىن قالاي وتكىزگەن دۇرىس؟
قازاقستان مۇسىلماندارى ءدىني باسقارماسى رامازان ايىنىڭ سوڭعى ون كۇنىندە بارىنشا ساۋاپقا قول جەتكىزىپ، سول كۇندەردىڭ بەرەكەسىن جىل بويى ساقتاپ قالۋدىڭ بىرنەشە جولدارىن ايتىپ ءوتتى، - دەپ حابارلايدى Massaget.kz تىلشىسى.
سۇيىكتى سەريالدى ءوشىرۋ
بالكىم، رامازان ايىنىڭ باسىندا-اق كوگىلدىر ەكراننان باس تارتۋدى جوسپارلاعان بولارسىز. ەگەر ول جوسپارىڭىزدا بولماسا، وندا رامازان ايىنىڭ سوڭعى ون كۇنى - تەلەديدار پۋلتىن الىستاۋ جەرگە قويىپ قويۋدىڭ ەڭ ءتيىمدى كەزى.
عالامتوردى دا ءوشىرۋ
قاسيەتتى ايدىڭ 21- كۇنى كەلگەنشە بار ۋاقىتىمىزدى عالامتور پاراقشالارىندا قۇرى جىبەرگەن بولساق، ناعىز قىلمىس جاساعان بولامىز. عالامتورعا دا از كىرۋگە تىرىسىڭىز.
باس قوسۋلاردى قىسقارتۋ
رامازان ايىنىڭ سوڭعى كۇندەرى وڭاشالانۋدى تالاپ ەتەدى. تاڭنان كەشكە دەيىن مەشىتتە وتىرىپ قۇلشىلىق جاساۋعا اركىمنىڭ جاعدايى كەلە بەرمەسى ايدان انىق. الايدا ءارقايسىمىزدىڭ بوس سوزدەن، تالاس-تارتىستان، اۋىزاشاردان باستالىپ بىرنەشە ساعاتتارعا سوزىلعان كەزدەسۋلەردەن، تاڭعا دەيىن اڭگىمە-دۇكەن قۇرىپ وتىرۋدان تىيىلۋعا ەرىك-جىگەرىمىز جەتەدى.
قۇلشىلىقتى ارتتىرۋ
رامازان ايىنىڭ اياعىندا كوپشىلىگىمىز شارشاڭقىراپ قالامىز. بالكىم، بۇل السىزدىككە سەبەپ بولعان رەجيمنىڭ بۇزىلۋى مەن اشتىق سەزىمدەرى بولار. قالاي بولعاندا دا، ءبىزدىڭ ىقىلاسىمىز السىرەيدى، ءبىراق وعان جول بەرۋگە بولمايدى.
ءۇي شارۋاسىن جەڭىلدەتۋ
بۇل ايدىڭ سوڭعى كۇندەرىندەگى ەڭ ءتيىمسىز تىرلىك - ۇيىڭىزگە تازالىق جاساۋ، ياعني ءبىر قولىڭىزبەن توبەنى اكتەپ، ءبىر جاقتان كىلەم جۋۋ. نەگىزىندە، ءۇيدىڭ اۋاسىن جاڭارتىپ، ۇيگە مەرەكەلىك اتموسفەرانى رامازان ايى كىرمەس بۇرىن جاساۋعا ءتيىسپىز. ەگەر ءدال ۋاقىتىندا جاساپ ۇلگەرمەي قالعان بولساڭىز، بارىنشا جەڭىلىن تاڭداڭىز: ايت كۇنىنىڭ الدىندا ءۇيدى تازالاپ، مەرەكەلىك اشەكەيلەر ءىلىپ قويىڭىز.
دۇكەندە كەزەكتە تۇرماۋ
ايت كۇندەرى وتباسىمىزدى، جاقىندارىمىزدى قۋانتۋعا اسىققاندى جاقسى كورەمىز. الايدا، سىيلىق الامىن دەپ اسىرا سىلتەۋدىڭ قاجەتى شامالى. ورازا ايتى - بۇل ادەمى سىيلىق بەرۋدەن جارىس كۇنى ەمەس، قۋانىشتى ءبولىسۋ، ماحابباتتى جەتكىزۋدىڭ ءبىر جولى، مۇمكىندىگى. بەرەكەلى داستارحان، كىشىگىرىم ەستەلىك سىيلىقتار، جايلى اتموسفەرا مەرەكەنى سەزىنۋگە تاپتىرماس قۇرال بولماق.
ىسىراپ جاساۋدان باس تارتۋ
مۇسىلمان ايەلدەرگە بەرەتىن تاعى ءبىر ماڭىزدى كەڭەس. ايت كۇنىنە ەكى-ءۇش كۇن قالعاندا، ءتىپتى ءبىر اپتا قالعاندا ازىق-تۇلىك ءتىزىمىن جاساۋدى باستايمىز. بۇل جاقسى. دەگەنمەن، ەڭ باستىسى اسپازدىق شابىتىمىز شەگىنەن شىعىپ كەتپەۋىن قاداعالاعان ءجون.
كەشىرىم سۇراۋ
ەندى جان دۇنيەمىز جايلى ءسوز قوزعايىق. رامازان بويى كەشىرىم سۇراۋىم كەرەك، تۋىستارمەن قارىم-قاتىناستى جاقسارتۋ كەرەك، وتباسىلىق ومىرىمە جىلۋلىقتى قايتارۋىم كەرەك دەپ ويلاپ جۇرگەن بولارسىز. قاسيەتتى ايدىڭ سوڭعى ون كۇنى وسى ويلاردىڭ جۇزەگە اسۋىنا تاپتىرمايتىن ءسات. اتا-اناڭىزدان، جولداسىڭىزدان، اعا-باۋىر، تانىستارىڭىزدان، جاراتۋشىدان كەشىرىم سۇراڭىز. ءوزىڭىز دە ءسىزدى اشىق ءارى جاسىرىن تۇردە رەنجىتكەن جاندار بولسا، كەشىرىڭىز.
ماقساتتاردى جۇزەگە اسىرۋ
رامازان ايىنىڭ باسىندا الدىڭىزعا ماقسات قويعانىڭىز بەلگىلى: قۇران وقۋدى باستاۋ، ءناپىل نامازدار وقۋ، ۋادەگە بەرىك بولۋ، كۇندە اتا-اناڭىزعا حابارلاسۋ، ت. ب.
ەگەر رامازان ايىندا ماقساتىڭىزعا جەتۋدىڭ قادامىن جاساماعان بولساڭىز، قاسيەتتى ايدىڭ بەرەكەتى ءبىزدى تاستاپ كەتپەي تۇرىپ، سوڭعى ون كۇنىندە باستاڭىز. ءبىر قادام جاسار بولساڭىز، حاق تاعالا مارەگە جەتۋگە جاردەم بەرەدى.
دۇعا تىلەۋ
ەڭ سوڭعى كۇنگە دەيىن، ساعاتقا، ءتىپتى مينۋتقا دەيىن اللا تاعالادان جۇرەگىمىزدى مازالاعان ۋايىمىمىزدى جەڭىلدەت دەپ، وزىنە اپارار جولدى كورسەتۋىن، كۇنامىزدى كەشىرىپ، جاقىندارىمىزدى جانناتپەن سۇيىنشىلەۋىن سۇراۋعا ءتيىسپىز.
بيىل ورازا 23- ناۋرىزدا باستالدى.
ەسكە سالايىق، بۇعان دەيىن ءبيىلعى پىتىر ساداقا مولشەرى بەلگىلەنگەنى حابارلانعان بولاتىن. ءپىتىر ساداقانى رامازان ايىنىڭ ءبىرىنشى كۇنىنەن ورازا ايت نامازىنا دەيىن بەرۋگە بولادى.
