كوكتەم- جاز ماۋسىمىندا قازاقستاننان شەتەلگە 10 نان استام جاڭا رەيس اشىلادى

استانا. قازاقپارات - كوكتەم-جاز ماۋسىمىنا قاراي دوحا، انكارا، مەدينا، باكۋ جانە دۋشانبەگە جاڭا رەيستەر اشىلادى.

سونىمەن قاتار، ىستانبۇل، تبيليسي، پحۋكەت، مالە، دەلي، چەندۋ، لوندون، يراكليون جانە پودگوريتساعا رەيستەر كوبەيەدى، دەپ حابارلايدى قازاقپارات مادەنيەت جانە سپورت مينيسترلىگىنە سىلتەمە جاساپ.

بۇل اۆيارەيستەردى قابىلداۋعا الماتى مەن استانا اۋەجايلارى عانا ەمەس، شىمكەنت، اقتاۋ جانە تۇركىستان اۋە ايلاقتارى جۇمىلدىرىلادى.

ءبىرقاتار شەتەلدىك اۆياكومپانيالار دا قازاقستانمەن اۋە قاتىناسىن جولعا قويۋدى جوسپارلاپ وتىر.

مىسالى، مالايزيالىق Air Asia ح لوۋكوستەرى كۋالا- لۋمپۋردان الماتىعا، ال Thai Air Asia تاي تاسىمالداۋشىسى بانگكوكتان الماتىعا ۇشادى.

يراندىق Qeshm Air كومپانياسى الماتى - توكيو باعىتى بويىنشا رەيس اشۋدى جوسپارلاپ وتىر.

وماندىق SalamAir 1 شىلدەدەن باستاپ ماسكات - الماتى رەيسىن ىسكە قوسادى.

بۇدان باسقا، Air Astana وتاندىق تاسىمالداۋشىسى الماتى مەن تەل- اۆيۆ اراسىندا اپتاسىنا ەكى تۇراقتى رەيستى ورىنداۋ تۋرالى ماسەلەنى پىسىقتاۋدا.

«جاڭا باعىتتاردى اشۋ - قازاقستاندىق تۋريزمدى دامىتۋ ءۇشىن ماڭىزدى قادام. وسىنىڭ ارقاسىندا ەلىمىزگە ساياحاتتاۋدى جوسپارلاپ وتىرعان شەتەلدىك قوناقتاردىڭ قازاقستانعا كەلۋىنە كوپ مۇمكىندىك پايدا بولادى. جاڭا مارشرۋتتاردى ىسكە قوسۋ باعىتىندا شەتەلدىك ارىپتەستەرمەن كەلىسسوزدەر ۇنەمى جۇرگىزىلەدى. مىسالى، وتكەن جىلى 7 ەلگە 10 جاڭا باعىت اشىلدى. بيىل دا بۇل جۇمىس جالعاسىن تابادى»، - دەيدى تۋريزم يندۋسترياسى كوميتەتىنىڭ ءتوراعاسى داستان رىسپەكوۆ.

رەداكتور

جانات قاپالبايەۆا