ا ق ش- تا تىكەلەي ەفيردە 10 ادامدى ولتىرگەن جىگىت ءومىر بويىنا سوتتالدى

استانا. قازاقپارات - نيۋ- يورك سوتى 2022 -جىلى مامىردا بۋففالو قالاسىندا ناسىلدىك وشپەندىلىكپەن 10 ادامدى اتىپ ولتىرگەن 19 جاستاعى پەيتون گەندروندى مەرزىمىنەن بۇرىن بوساتۋ قۇقىعىنسىز ءومىر بويىنا باس بوستاندىعىنان ايىرۋعا ۇكىم شىعاردى، دەپ حابارلايدى قازاقپارات Euronews-كە سىلتەمە جاساپ.

ول ءوز قىلمىسىن شلەمىندەگى كامەرانىڭ كومەگىمەن تىكەلەي ەفيردەن كورسەتكەن بولاتىن.

سۋديالار سوت پروتسەسى كەزىندە قازا تاپقانداردىڭ تۋىستارىنىڭ ەموتسياعا تولى كۋالىگىن تىڭدادى. ۇكىم شىققاننان كەيىن كەيبىرى ءوز اشۋىن ۇستاي الماي قالدى.

پوليتسيا سوتتالۋشىنى زالدان الىپ كەتتى. كەيىنىرەك پروكۋرور ەموتسياسىن ۇستاي الماعاندارعا ايىپپۇل سالىنبايتىنىن مالىمدەدى.

قازا تاپقاندار (20-86 جاس ارالىعىندا) دۇكەننىڭ ساتىپ الۋشىلارى مەن قىزمەتكەرلەرى ەدى.

گەندرون ۆينتوۆكانى زاڭدى تۇردە ساتىپ العان، ءبىراق نيۋ- يورك شتاتىندا وق- ءدارى ساتۋعا رۇقسات جوق.

فوتو: Derek Gee/Buffalo News

اۆتور

اقبوپە ءابدراسۋل