كەرەمەت وقيعا: 10 شاقىرىم بيىكتەن قۇلاپ ءتىرى قالعان ستيۋاردەسسا - فوتو
ناتيجەسىندە تەڭىز دەڭگەيىنەن 10000 بيىكتىكتە ۇشاق ەكىگە بولىنەدى. قۇتقارۋشىلار جولاۋشىلاردىڭ مايىتتەرىن جيناۋ كەزىندە 22 جاستاعى ستيۋاردەسسا - ۆەسنا ۆۋلوۆيچ ءتىرى قالعانىن انىقتادى.
ەكى اياعى مەن بىرنەشە قابىرعاسى سىنعان ستيۋاردەسسا اۋىر جاراقات الىپ، امان قالدى. كەيىن ۇشاقتى جارىپ جىبەرگەندەردىڭ حورۆاتيا ازاتتىق قوزعالىسىنىڭ مۇشەلەرى ەكەنى بەلگىلى بولدى.
وقيعا الدىنداعى جاعداي
ەكىنشى دۇنيەجۇزىلىك سوعىستان كەيىن بالقان تۇبەگىندە يۋگوسلاۆيا سوتسياليستىك فەدەراتيۆتىك رەسپۋبليكاسى قۇرىلدى. بۇل ەلدىڭ قۇرامىنا التى وداقتاس رەسپۋبليكا - سەربيا، حورۆاتيا، چەرنوگوريا، سلوۆەنيا، بوسنيا جانە گەرتسەگوۆينا، ماكەدونيا كىردى.
ەكىنشى دۇنيەجۇزىلىك سوعىسقا دەيىن تاۋەلسىز بولعان حورۆاتيا مەن باسقا وداقتاس رەسپۋبليكالار دا سەربتەردىڭ قول استىندا ءومىر سۇرۋگە كەلىسپەدى. ك س ر و كەزىندەگىدەي وداق ىشىندە كۇشپەن ۇستالدى.
ول كەزدە حورۆاتيانى ازات ەتۋ ۇيىمىنا مۇشە بولعان حورۆاتتار ديۆەرسيالىق ارەكەتتەردى ءجيى جاسايتىن. ستوكگولمنەن بەلگرادقا ۇشىپ بارا جاتقان ۇشاقتى جارىپ جىبەرگەندەر دە حورۆاتتار ەدى.
جارىلىس
1972 -جىلى 26-قاڭتاردا جەرگىلىكتى ۋاقىت بويىنشا ساعات 13:30-دا يۋگوسلاۆيانىڭ JAT (Jugoslovenski Aerotransport، حالىقارالىق اتاۋى - Yugoslav Airlines) اۆياكومپانياسىنا تيەسىلى McDonnell Douglas DC-9-32 ۇشاعى ستوكگولم- كوپەنگاگەن- زاگرەب- بەلگراد باعىتى بويىنشا ۇشتى.
14:30-دا ۇشاق كوپەنگاگەنگە قونىپ، ستيۋاردەسسالار كومانداسى اۋىسادى. ساعات 15:15 ماكدوننەلل دۋگلاس دانيا استاناسىنان ۇشادى. ول كەزدە ۇشاقتا 5 ەكيپاج مۇشەسى مەن 23 جولاۋشى بولعان.
ساعات 17:00-دە ۇشاق حورۆاتيانىڭ استاناسى زاگرەبكە قونۋى كەرەك ەدى. الايدا مەجەلى جەرگە جەتپەيدى.
ۇشۋدان 45 مينۋت وتكەن سوڭ، ۇشاق 10160 مەتر بيىكتىككە كوتەرىلگەندە، ۇشاق بورتىندا قاتتى جارىلىس بولادى.
قۇلاعان ۇشاقتىڭ بولىكتەرى گ د ر مەن چەحوسلوۆاكيانىڭ شەكاراسىنداعى اۋىلعا تۇسەدى (قازىر بۇل ەكى ەل جوق. گ د ر گ ف ر-عا قوسىلدى، چەحوسلوۆاكيا ەكىگە ءبولىندى).
اپات بولعان جەرگە ءبىرىنشى بولىپ اۋىل تۇرعىندارى جەتەدى، ودان كەيىن قۇتقارۋشىلار كەلەدى. ۇشاقتا بولعانداردىڭ دەنەلەرى جان-جاقتا شاشىلىپ جاتادى، ونداعىلاردىڭ بارلىعى قازا تاپقانىنا ەشكىم كۇمان كەلتىرگەن جوق ەدى.
قۇتقارۋشىلار ۇشاق سىنىقتارىنان ادامداردىڭ دەنەلەرىن جيناۋعا كىرىسەدى. وسى ۋاقىتتا قۇتقارۋشىلارعا كومەكتەسىپ جاتقان جەرگىلىكتى حالىقتىڭ وكىلى برۋنو حونكە ۇشاق بولىكتەرىنىڭ اراسىنان امان قالعان قىزدى كورەدى. ول ارەڭ تىنىس الىپ جاتقان ۆەسنا ۆۋلوۆيچ بولاتىن. برۋنو ەكىنشى دۇنيەجۇزىلىك سوعىستا نەمىس ارمياسىندا دارىگەر بولعاندىقتان. بويجەتكەنگە العاشقى كومەكتى ءوزى كورسەتەدى.
ستيۋاردەسسانىڭ ەكى اياعى، بىرنەشە قابىرعاسى، ومىرتقاسى سىنعان، دەنەسىنىڭ باسقا بولىكتەرى ءارتۇرلى دارەجەدە زاقىمدالعان ەدى.
ستيۋاردەسسانىڭ كەيىنگى تاعدىرى
سول كەزدە ۆەسنا ۆۋلوۆيچ ستوكگولمنەن بەلگرادقا ۇشىپ بارا جاتقان ۇشاقتا كەزدەيسوق بولعان. ۋنيۆەرسيتەتتە وقۋىمەن قاتار ول بورتسەرىكتەردى دايىندايتىن ارنايى كۋرستا وقيدى.
قىز اعىلشىن ءتىلىن جاقسىراق ۇيرەنۋ ءۇشىن لوندونعا قىسقى دەمالىسقا بارادى. ءبىراز ۋاقىت ۇلى بريتانيا استاناسىندا تۇرعان ۆەسنا سول جەردە دوستارىنىڭ بىرىمەن تانىسادى. دوسى ونى ستوكگولمگە شاقىرادى.
بەلگرادقا قايتۋ ۋاقىتى كەلگەندە، ونىڭ دوسى ۆەسناعا ستوكگولم-زاگرەب باعىتى بويىنشا ءوزىنىڭ ورنىنا تاعىلىمدامادان ءوتۋشى رەتىندە ۇشۋدى ۇسىنادى. ول كەلىسەدى.
ۇشاق جارىلعان كەزدە بويجەتكەن ورىندىقتاردىڭ بىرىندە بولعان. الايدا، ەسىن جيعان كەزدە ول جارىلىس كەزىندە ۇشاقتىڭ قاي بولىگىندە بولعانىن جانە نە ىستەپ جۇرگەنىن ەسىنە تۇسىرە المايدى.
بويجەتكەن جارىلىس دىبىسىن ەستىپ، ەسىنەن تانىپ قالعان كەزدە سالوندا بولعانىن جانە جولاۋشىلارعا قىزمەت كورسەتىپ جاتقانىن ايتادى.
بويجەتكەندى تەكسەرگەن كەزدە ونىڭ ومىرتقاسى مەن ودان وتەتىن جۇلىن جۇيەسى زاقىمدالعانى انىقتالدى. وسىعان بايلانىستى قىزدىڭ دەنەسىنىڭ بەلدەن تومەن بولىگى ۇزاق ۋاقىت بويى جۇمىس ىستەمەيدى. كەيىن وعان ەرەكشە وتالار جاسالادى.
كومادان شىققاننان كەيىن قىز 10 اي بويى قوزعالىسسىز جاتادى. وقيعادان ءبىر جارىم جىل وتكەن سوڭ ول ەسىن جيىپ، اياققا تۇرادى.
10 مىڭ مەتر بيىكتىكتەن قۇلاپ امان قالعان ۆەسنا يۋگوسلاۆيادا عانا ەمەس، الەمگە تانىمال بولادى. بويجەتكەنمەن كوپتەگەن جەرگىلىكتى جانە شەتەلدىك گازەتتەر مەن تەلەارنالار سۇحبات جاسايدى. ولار ۆەسنا تۋرالى دەرەكتى فيلم تۇسىرەدى، ونى ءارتۇرلى شوۋلارعا شاقىرادى.
ۆەسنا ساۋىققاننان كەيىن ول JAT اۋە كومپانياسىندا ستيۋاردەسسا رەتىندە بۇرىنعى جۇمىسىنا قايتا ورالعىسى كەلەدى. الايدا اۋە كومپانياسى ونى جۇمىسقا الۋدان باس تارتادى.
ءبىراز ۋاقىتتان كەيىن قوعامنىڭ قىسىمىنا بايلانىستى بويجەتكەن ستيۋاردەسسا ەمەس، اۋە كومپانياسىنىڭ كەڭسەسىنە جۇمىسقا قابىلداندى. اۋە كومپانياسىنىڭ كەڭسەسىندە 1990 -جىلعا دەيىن قىزمەت ەتەدى.
1985 -جىلى ۆەسنا ۆۋلوۆيچ گيننەستىڭ رەكوردتار كىتابىنا قورعانىش قۇرالدارىسىز قۇلاۋدان امان قالعان ادام رەتىندە ەنگەن.
بويجەتكەن لوندونعا رەكوردتار كىتابىنا ەنگەنى تۋرالى كۋالىكتى الۋ راسىمىنە كەلگەندە، جاستىق شاعىنىڭ كۋميرى پول ماككارتني دە ءدال وسىنداي قۇجات الۋعا كەلەدى.
1990 -جىلى ۆەسنا سوتسياليستىك رەجيمگە قارسى شەرۋلەرگە بەلسەندى قاتىستى. سودان كەيىن اۆياكومپانيا ونى جۇمىستان شىعارادى.
1992 -جىلدىڭ باسىندا وداقتاس رەسپۋبليكالار ءوز تاۋەلسىزدىگىن جاريالاپ، يۋگوسلاۆيا ىدىراپ كەتتى.
سول كەزدە يۋگوسلاۆيا مەن سەربيادان ءبولىنىپ شىققان تاۋەلسىز رەسپۋبليكالار اراسىندا قارۋلى قاقتىعىستار باستالدى. بۇل قاقتىعىستاردا ەۋرووداق پەن ناتو تاۋەلسىز رەسپۋبليكالاردى پايدالانادى. ناتيجەسىندە سەربيا مەن ەۋرووداق اراسىنداعى قارىم-قاتىناس ناشارلايدى.
وسىنداي جاعدايدا ۆەسنا سەربيانىڭ ەۋرو وداققا مۇشە بولۋىن قولدايتىن دەموكراتيالىق پارتيانىڭ قاتارىنا قوسىلادى. ومىردەن وتكەنشە وسى پارتيانىڭ مۇشەسى رەتىندە ساياسي قىزمەتكە بەلسەنە ارالاسادى.
2016 -جىلى 66 جاستاعى ۆەسنا ۆۋلوۆيچ بىرنەشە كۇن بەلگرادتاعى ۇيىنەن شىقپاعان. سوسىن دوستارى پوليتسيا شاقىرادى. پوليتسەيلەر ەسىكتى بۇزىپ، ايەلدى ءولى كۇيىندە تاپتى.
اقپارات دەرەككوزى: https://massaget.kz/layfstayl/alemtanu/syrly-alem/77978/