14:38, 18 - شىلدە 2022 | GMT +5
قىتايدا تابيعاتتىڭ توسىن مىنەزىنەن 10 نان استام ادام مەرت بولدى
نۇر-سۇلتان. قازاقپارات - قىتايدىڭ وڭتۇستىك - باتىسى مەن سولتۇستىك- باتىسى سۋ تاسقىنىنان زارداپ شەكتى.
تابيعاتتىڭ توسىن مىنەزىنەن 10-نان استام ادام مەرت بولدى. تاعى 10-نان استامى ءىز-ءتۇزسىز جوعالدى. اپاتتان سىچۋان پروۆينسياسىندا 1300 تۇرعىن، ال گانسۋ پروۆينسياسىندا 3000 تۇرعىن باسپاناسىن تاستاپ، قاۋىپسىز جەرگە كوشۋگە ءماجبۇر بولدى.
ماماندار ايماقتا جارتى كۇندە ءبىر ايلىق نورمادان ارتىق جاۋىن جاۋعانىن ايتادى. كەي وڭىرلەردە كەرىسىنشە اپتاپ ىستىق اپشىنى قۋىرىپ بارادى. جىجياڭ پروۆينسياسى مەن شاڭحاي قالاسىندا اۋا تەمپەراتۋراسى 42 گرادۋستان اسىپ كەتكەن. دارىگەرلەر حالىقتى بارىنشا ساق بولۋعا شاقىرادى. ساراپشىلار اۋا رايىنىڭ قۇبىلمالىلىعىن كليماتتىڭ وزگەرۋىمەن بايلانىستىرىپ وتىر.
24.kz
