رەسەيلىكتەر قۇرعان قارجى پيراميداسىنا اقتوبە تۇرعىندارى 10 ميلليارد تەڭگە سالعان
ولار 6 جىلدان 12 جىلعا دەيىن باس بوستاندىعىنان ايىرىلدى، دەپ حابارلايدى قازاقپارات ءتىلشىسى. ءىس 2021 -جىلى سوتقا ءتۇسىپ، وندا رەسەي ازاماتتارى پاۆەل ليتۆينەنكو، يۋري موسكۆين جانە اقتوبە قالاسىنىڭ تۇرعىنى راۆيل قازىبايەۆقا قىلمىستىق كودەكستىڭ «ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ولارعا قاتىسۋ»، «قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ» باپتارى بويىنشا ايىپ تاعىلدى.
ءىس ماتەريالىنا سۇيەنسەك، پاۆەل ليتۆينەنكو، يۋري موسكۆين جانە راۆيل قازىبايەۆ 2019 -جىلدىڭ قازان ايى مەن 2020 -جىلدىڭ اقپان ايى ارالىعىندا قارجىلىق قىلمىس جاساعان. پاۆەل ليتۆينەنكو ۇزاق جىلدار بويى ءتۇرلى جەلىلىك ماركەتينگ ارقىلى ساتۋ- ساتىپ الۋمەن اينالىسىپ، تاجىريبە جيناعان. سول قابىلەتىن العا تارتىپ، وزگەلەردى الداپ- ارباۋ جولىن ويلاستىرىپ، قارجى پيراميداسىن قۇردى. ءسويتىپ 2019 -جىلى ج ش س- ءىن زاڭداستىردى. ادامداردى كانادالىق «ASHLY» كومپانياسىنا ينۆەستيتسيا سالۋعا ۇگىتتەدى. ول ينۆەستيتسيا سالۋدىڭ 7 جولىن ۇسىنعان. ەڭ تومەنگى باعا 300 مىڭ تەڭگە بولسا، ەڭ كوبى 10 ميلليون تەڭگە دەپ بەلگىلەنگەن. وسىلايشا ادامدارعا 10 ميلليارد تەڭگەدەن استام شىعىن كەلدىردى. سوتتالۋشىلار شىعىننىڭ كوپ بولىگىن وتەگەنىمەن، ءالى دە 2,4 ميلليارد تەڭگەنى قايتارۋى ءتيىس.
اقتوبە قالالىق №2 سوتىندا قارالعان قىلمىستىق ىسكە ۇكىم شىقتى. پاۆەل ليتۆينەنكو 12 جىلعا باس بوستاندىعىنان ايىرىلدى. ول 7 جىل بويى كوممەرتسيالىق جانە قارجىلىق ۇيىمداردا باسشىلىق قىزمەت اتقارا المايدى. يۋري موسكۆين 9 جىلعا، ال راۆيل قازىبايەۆ 6 جىلعا باس بوستاندىعىنان ايىرىلدى. ولار جازاسىن قاۋىپتىلىگى ورتاشا تۇزەتۋ مەكەمەسىندە وتەيدى. سونىمەن بىرگە ءۇش سوتتالۋشى جابىرلەنۋشىلەردىڭ شىعىنىن تولىق وتەۋى ءتيىس. جابىرلەنۋشىلەردىڭ كوبى 300 مىڭ تەڭگە اقشاسىن سەنىپ بەرسە، كەيبىرى 4-10 ميلليون تەڭگەسىن اۋدارعان. سوت ۇكىمى زاڭدى كۇشىنە ەنگەن جوق.
