تۇركيانىڭ دەنساۋلىق ساقتاۋ تۋريزمى سەكتورىنىڭ كىرىسى 10 ميلليارد دوللاردان استى

بۇل تۋرالى انتاليا حالىقارالىق ساۋىقتىرۋ تۋريزمى جانە ءبىلىم بەرۋ قاۋىمداستىعىنىڭ (UASTED) باسشىسى مەحمەت كانپولات مالىمدەدى، دەپ حابارلايدى قازاقپارات انادولى اقپارات اگەنتتىگىنە سىلتەمە جاساپ.
كانپولات ەلدىڭ دەنساۋلىق ساقتاۋ تۋريزمى سەكتورىنىڭ كىرىسى پرەزيدەنت رەجەپ تايىپ ەردوعاننىڭ 2023 -جىلعا قويعان ماقساتىنان اسىپ تۇسكەنىن اتاپ ءوتتى.
«بۇل سالانىڭ كىرىسى جىلىنا 10 ميلليارد دوللاردان استى»، - دەدى UASTED باسشىسى.
ۇيىم باسشىسى شەتەلدىكتەر تۇركياعا نەگىزىنەن ءتىس ەمدەۋ، ونكولوگيالىق جانە ەستەتيكالىق وتا جاساۋعا كەلەتىنىن ايتتى. سونداي- اق ول سوڭعى جىلدارى تۇركيادا تۇركىتىلدەس ەلدەردەن كەلگەن ناۋقاستاردىڭ كوبەيگەنىنە نازار اۋداردى.
«الەمدەگى ساۋىقتىرۋ تۋريزمى نارىعىنىڭ كولەمى 100 ميلليارد دوللارعا جەتەدى. سوڭعى ون جىلداعى ينۆەستيتسيانىڭ ارقاسىندا تۇركيا ساۋىقتىرۋ تۋريزمى سالاسىندا العاشقى بەستىككە ەندى»، - دەدى كانپولات.
بۇل رەتتە ول ۋكراينادا سوعىس باستالعاننان كەيىن تۇركياداعى ەمدەۋ مەكەمەلەرىنە رەسەيدەن كەلگەن ناۋقاستاردىڭ سانى ارتقانىن اتاپ ءوتتى.
«رەسەي مەن ۋكراينا اراسىنداعى سوعىس اياقتالعاننان كەيىن بۇل ەلدەر ازاماتتارىنىڭ تۇركيادا ەمدەلۋگە دەگەن قىزىعۋشىلىعى جوعارى بولاتىنىنا سەنىمدىمىن»، - دەدى UASTED باسشىسى.
اۆتور: زارينا تۋعانبايەۆا