07:41, 11 - ءساۋىر 2022 | GMT +5
شەتەلدىكتەر قازاقستانعا كىرۋ ءۇشىن 10 مىڭ دوللاردان جالعان پاسپورت ساتىپ العان
الماتى. قازاقپارات - الماتى اۋەجايىندا جالعان قۇجاتپەن ەلگە كىرمەك بولعان شەتەلدىكتەر ۇستالدى، دەپ حابارلايدى قازاقپارات.
ۇلتتىق قاۋىپسىزدىك كوميتەتى شەكارا قىزمەتىنىڭ مالىمەتىنشە، الماتى قالاسىنىڭ اۋەجايىندا پاسپورتتىق باقىلاۋدان ءوتۋ كەزىندە جالعان قۇجات ۇسىنعان ورتالىق ازيا ەلدەرىنىڭ 4 ازاماتى ۇستالعان.
جۇگىن تەكسەرۋ كەزىندە ولاردىڭ ناقتى پاسپورتتارى تابىلدى. الدىن الا دەرەكتەر بويىنشا، ولار جالعان قۇجاتتاردى قازاقستان رەسپۋبليكاسى ارقىلى ترانزيتپەن ءوتۋ ءۇشىن ساتىپ العان. ءبىر جالعان ءتولقۇجاتتىڭ قۇنى - 10 مىڭ ا ق ش دوللارىن قۇراعان. جالعان قۇجاتتار تاركىلەندى. ولاردى ەلدەن دەپورتاتسيالاۋ ماسەلەسى شەشىلىپ جاتىر.
