قازاقستاندا جىلقى سانى 10 پايىزعا جۋىق وسكەن

نۇر-سۇلتان. قازاقپارات - جىل باسىنان بەرى ەلدەگى جىلقى سانى 9,6 پايىزعا وسكەن.

بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ۇكىمەت وتىرىسىندا ايتتى، دەپ حابارلايدى قازاقپارات ءتىلشىسى.

«مال شارۋاشىلىعىندا مال مەن قۇس سانىنىڭ وسكەنى بايقالادى. مىسالى، ءىرى قارا سانى 4,8 پايىز ارتىپ، 8,8 ميلليون باسقا جەتسە، قوي مەن ەشكى - 2,6 پايىزعا، جىلقى - 9,6 پايىزعا، قۇس - 4,4 پايىزعا كوبەيدى. سونداي-اق، ەت ءوندىرۋ كولەمى - تىرىدەي سالماقتا 6 پايىزعا، ءسۇت ءوندىرۋ كولەمى - 3,3 پايىزعا ءوستى»، - دەيدى مينيستر. بۇل ءوسىم ءوز كەزەگىندە تاماق ونىمدەرىنىڭ وندىرىسىنە دە وڭ اسەر ەتكەن كورىنەدى.

«كورسەتىلگەن كەزەڭدە تاماق ونىمدەرىن ءوندىرۋ كولەمى 4,8 پايىزعا ءوسىپ، 1 تريلليون 421,2 ميلليارد تەڭگەنى قۇرادى. بۇل رەتتە قانت ءوندىرۋ كولەمى - 3 ەسە، وڭدەلگەن كۇرىش كولەمى - 29,9 پايىزعا، سارى مايدىڭ ءوندىرىسى 12,8 پايىزعا، جارمانىڭ - 12,6 پايىزعا، قىسقى ءسۇت ونىمدەرىنىڭ - 4,5 پايىزعا، ىرىمشىك پەن سۇزبەنىڭ - 3 پايىزعا، ۇننىڭ - 1,5 پايىزعا، وڭدەلگەن ءسۇتتىڭ - 0,9 پايىزعا جانە وسىمدىك مايىنىڭ ءوندىرىسى 0,5 پايىزعا ارتقانى بايقالادى»، - دەدى ەربول قاراشوكەيەۆ.

ۆەدومستۆو باسشىسىنىڭ ايتۋىنشا، قاڭتار- تامىز ايلارىندا اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيا كولەمى 43,2 پايىزعا ۇلعايىپ، 427 ميلليارد تەڭگە بولعان.