ەكى وڭىردە – اپتاپ ىستىق، باسقا وڭىرلەردە كۇن بۇزىلادى: 10-تامىز كۇنگى اۋا رايى
قازگيدرومەتتىڭ مالىمەتىنشە، سيكلون سالدارىنان كۇن كۇركىرەپ، جاڭبىر جاۋادى. سولتۇستىك- شىعىس پەن شىعىستا قاتتى جاڭبىر جاۋادى، جەكەلەگەن اۋدانداردا بۇرشاق تۇسەدى، داۋىل تۇرادى. ەلىمىزدىڭ باتىسى مەن وڭتۇستىگىندە قۇرعاق جانە ىستىق اۋا رايى ساقتالادى.
رەسپۋبليكا بويىنشا كەي جەرلەردە جەل كۇشەيىپ، وڭتۇستىكتە شاڭدى داۋىل كوتەرىلەدى.
قاراعاندى، سولتۇستىك قازاقستان، پاۆلودار، شىعىس قازاقستان وبلىستارىنىڭ كەي جەرلەرىندە نايزاعاي جارقىلدايدى، بۇرشاق جاۋىپ، داۋىل سوعادى. جەل قارقىنى - 15-20 م/س. شىعىس قازاقستان وبلىسىندا سەكۋندىنا 23 مەتر جىلدامدىقپەن كۇشتى جەل تۇرادى.
تۇندە جانە تاڭەرتەڭ پاۆلودار وبلىسىنىڭ كەي جەرلەرىندە تۇمان تۇسەدى.
اقمولا، الماتى وبلىستارىنىڭ كەي جەرلەرىندە نايزاعاي وينايدى، جەل ەكپىنى 15-20 م/س جەتەدى.
جامبىل وبلىسىنىڭ كۇندىز تاۋلى اۋداندارىندا كۇن كۇركىرەپ، بۇرشاق جاۋادى. كەي جەرلەردە شاڭدى داۋىل سوعادى. جەل جىلدامدىعى 15-20 م/س دەيىن كۇشەيەدى.
قوستاناي، كۇندىز تۇركىستان، اتىراۋ وبلىستارىنىڭ كەي جەرلەرىندە جەل قارقىنى - 15-20 م/س. تۇركىستان وبلىسىندا شاڭدى داۋىل كوتەرىلەدى.
كۇندىز اتىراۋ وبلىسىندا وتە قاتتى ىستىق ساقتالادى، ماڭعىستاۋ، باتىس قازاقستان وبلىستارىندا باسىم بولىگىندە قاتتى ىستىق، كەي جەرلەرىندە اپتاپ ىستىق بولادى.
قىزىلوردا، تۇركىستان، ماڭعىستاۋ، اتىراۋ، جامبىل، الماتى، اقتوبە وبلىستارىنىڭ باسىم بولىگىندە، قاراعاندى، باتىس قازاقستان وبلىستارىنىڭ كەي جەرلەرىندە، قوستاناي، شىعىس قازاقستان وبلىستارىنىڭ وڭتۇستىگىندە، اقمولا وبلىسىنىڭ جەكەلەگەن اۋداندارىندا توتەنشە ءورت قاۋپى ساقتالادى.