ا ق ش: كولورادو شتاتىندا قاسكوي سۋپەرماركەتتە 10 ادامدى اتىپ ءولتىردى

بۇل تۋرالى بوۋلدەر قالاسى پوليتسيا باسقارماسىنىڭ Twitter- دەگى پاراقشاسىندا حابارلاندى، دەپ حابارلايدى قازاقپارات.

«10 ادام قازا تاپتى»، - دەلىنگەن مالىمدەمەدە. بۇعان دەيىن ب ا ق اتىس سالدارىنان كەم دەگەندە التى ادام كوز جۇمعانىن، ولاردىڭ اراسىندا وقيعا ورنىنا كەلىپ جەتكەن قۇقىق قورعاۋ ورگاندارىنىڭ قىزمەتكەرى بولعانىن حابارلاعان. ءتارتىپ ساقشىلارى قازا بولعانداردىڭ تۋىستارىنا حابار بەرىلگەنشە، قۇربانداردىڭ ناقتى سانىن اتاعان جوق. قالالىق پوليتسيا باسقارماسىنىڭ وكىلى بۇعان دەيىن اتىس سالدارىنان قۇقىق قورعاۋ ورگاندارىنىڭ ءبىر قىزمەتكەرى قازا بولعانىن راستادى.

بوۋلدەر پوليتسيا دەپارتامەنتىنىڭ باستىعى ماريس گەرولد دۇيسەنبى كۇنى وتكەن باسپا ءسوز كونفەرەنسياسىندا بۇل اتىس ورنىنا بارعان 51 جاستاعى پوليتسيا قىزمەتكەرى ەريك تەللي ەكەنىن ناقتىلادى. گەرولد، سونداي- اق، قىلمىسكەر ادامنىڭ ۇستالعانىن راستادى. قىلمىسكەردىڭ ارەكەتىنە نە سەبەپ بولعانى بەلگىسىز، ونىڭ ەسىمى اتالماي وتىر. پوليتسيا باسقارماسى باسشىسىنىڭ ايتۋىنشا، وقيعانى تەرگەۋ بىرنەشە كۇنگە سوزىلۋى مۇمكىن.

ەسكە سالا كەتسەك، دۇيسەنبى كۇنى King Soopers سۋپەرماركەتىنىڭ قاسىندا بەلگىسىز بىرەۋ اتىس باستاپ، ودان كەيىن دۇكەننىڭ ىشىنە كىرىپ وق جاۋدىرعان.

اۆتور: زارينا تۋعانبايەۆا