ساۋد ارابياسى قاجىلىققا كەلەتىندەردىڭ سانىن 10 مىڭعا دەيىن قىسقارتتى
ءتۇرلى شەكتەۋ شارالارىنا قاراماستان اۋرۋ ءورشىپ بارادى. اسىرەسە ا ق ش، برازيليا جانە ءۇندىستاندا. تۇركياداعى جاعداي دا كوڭىل كونشىتپەيدى. مۇنداعى بيلىك ەلدى مەكەندەرگە كارانتين رەجيمىن ەنگىزىپ، الداعى قۇربان ايت مەرەكەسىنە دايىندىعىن باستاپ كەتتى. ا ق ش- تان كەيىن كوروناۆيرۋس ىندەتى برازيليادا كەڭ ەتەك جايدى. بۇگىندە وندا 2 ميلليوننان استام ادامعا دياگنوز قويىلعان. ونىڭ 80 مىڭى اۋرۋدىڭ قۇربانى بولدى. جالپى لاتىن امەريكانىڭ وزگە دە ەلدەرىندەگى جاعداي كوڭىل كونشىتپەيدى. وڭىردە پاندەميانىڭ كەسىرىنەن كەدەيلىك دەڭگەيى ارتتى. حالىق ءناپاقاسىنان ايىرىلىپ، ەكى قولعا ءبىر كۇرەك تابا الماي وتىر. دۇنيەجۇزىلىك دەنساۋلىق ساقتاۋ ۇيىمىنىڭ توتەنشە جاعدايلار جونىندەگى ديرەكتورى مايكل رايان جەنيەۆا قالاسىندا وتكەن بريفينگتە ايماقتاعى احۋالدىڭ وڭالاتىن ءتۇرى جوق ەكەنىن ايتىپ، الاڭداۋشىلىق بىلدىرەدى.
مايكل رايان، ددسۇ توتەنشە جاعدايلار جونىندەگى ديرەكتورى:
- لاتىن امەريكانىڭ ءبىراز وڭىرىندە جاعداي كۇننەن كۇنگە كۇردەلەنىپ بارادى. ۆيرۋستىڭ تارالۋى توقتاۋدىڭ ورنىنا كەرىسىنشە قارقىن الىپ بارادى. قازىر بوليۆيا، كولۋمبيا مەن برازيليادا جاعداي قيىن. COVID-19 بۇل ەلدەرگە ۇلكەن قاۋىپ ءتوندىرىپ تۇر. ال ارگەنتينادا ناۋقاستاردىڭ سانى 130 مىڭنان استى. ءبىر تاۋلىكتە 4 مىڭعا جۋىق ادام ۆيرۋس جۇقتىرسا، 113 ى كوز جۇمدى. جەرگىلىكتى بيلىك كارانتين رەجيمىن تامىزدىڭ 2 سىنە دەيىن ۇزارتتى. ال پەرۋدەگى اۋرۋحانالاردا بوس ورىن جوق. ناۋقاستارعا ارنالعان شاتىرلار دا لىق تولى. كەيبىرەۋلەرى اۋرۋحانا ءوز كولىگىندە وتىرىپ ەم قابىلداپ جاتىر. ايماقتا مەديتسينا قىزمەتكەرلەرى دە تاپشى.
لەوناردو چيرينوس، دارىگەر:
- سوڭعى 4-5 كۇندە ءولىم كورسەتكىشى كۇرت ارتىپ كەتتى. ورتاشا ەسەپپەن كۇندە 20 ادام جان تاپسىرادى. مەديتسينا سالاسىنا ۇلكەن اۋىرتپالىق ءتۇستى. ۆيرۋستىڭ وشاعىنا اينالعان ءۇندىستان دا ىندەتتەن كوز اشپاي تۇر. بۇندا تاۋلىگىنە 37 مىڭنان استام ادام كەسەلگە شالدىعىپ، 587 ءسى جان تاپسىردى. وسىلايشا ەلدە ناۋقاستار سانى 1 ميلليوننان ارتتى. ونىڭ 28 مىڭى اۋرۋدىڭ قۇربانى بولدى. ناۋقاستاردىڭ 62 پروتسەنتى دەرتىنەن ايىعىپ جاتىر. ۆيرۋستان ەڭ كوپ زارداپ شەككەن ماحاراشترا شتاتى بولدى. ىندەتتىڭ ورشۋىنە بايلانىستى جەرگىلىكتى ۇكىمەت ناۋقاستاردى قابىلدايتىن جاڭا ورىندار اشىپ جاتىر.
ارۋشي سايني، دارىگەر:
- بىزدە حالىقتىڭ امان قالۋى ماڭىزدى. بارلىق مەديتسينا قىزمەتكەرلەرى قولدان كەلگەننىڭ ءبارىن جاساپ جاتىر. جاڭادان اشىلعان عيماراتتا ادامداردى ەمدەۋ ءۇشىن بارلىق جاعداي جاسالىنعان. ازىرگە ءدارى- دارمەك تە جەتەدى. ال تۇركيادا كوروناۆيرۋسكە شالدىققاندار سانى 220 مىڭنان استى. قازىرگە دەيىن اتى جامان اۋرۋدان قۇلان تازا ايىققاندار - 203 مىڭ. بۇل ەلدىڭ دەنساۋلىق ساقتاۋ ءمينيسترى فاحرەتتين قوجانىڭ مالىمەتى.
مەرۋەرت قاناعات، ءتىلشى:
- تۇركيا دەنساۋلىق ساقتاۋ مينيسترلىگىنىڭ سوڭعى تاۋلىكتەگى اقپاراتى بويىنشا، 931 كىسى قاۋىپتى ىندەتكە شالدىعىپ، 17 ادام قايتىس بولدى. وسىلايشا، 11 - ناۋرىزدان بەرى ەلدە كوروناۆيرۋستان 5508 ادام كوز جۇمعان. ال جۇقپالى ۆيرۋستان 4 ايدا 203 مىڭ 2 ادام ەمدەلىپ شىقتى. بۇدان بولەك، تۇركيانىڭ ءبىرقاتار پروۆينتسياسىنىڭ ەلدى مەكەندەرى، شاعىن اۋداندارى مەن تۇرعىن ۇيلەرى وقشاۋلاندى. سەبەبى تۇرعىندار ساقتىق تالاپتارىن ورىنداماي، توي تويلاپ، جاقىن- تۋىستارىن ارالاپ كەتكەن. سالدارىنان جۇقپالى اۋرۋ بىرنەشە كىسىدە بايقالىپ، تۇگەل اۋىل وقشاۋلاندىرىلعان. قازىر تۇركيادا كارانتين تالاپتارى قاتاڭ. ەرەجەنى بۇزعاندارعا 3150 ليرا ايىپپۇل سالىنادى. بۇل شامامەن - 188 مىڭ تەڭگە. ال تۇركيالىقتاردىڭ ەڭ تومەنگى جالاقىسى - تەڭگەگە شاققاندا 140 مىڭ. سونىمەن قاتار تۇركيادا 81 پروۆينتسيانىڭ 70 كە جۋىعىندا ماسكاسىز سىرتقا شىعۋعا تىيىم سالىنعان. تاقپاعاندارعا 900 ليرا، ياعني 55 مىڭ تەڭگە ايىپپۇل سالىنادى.
كۇبرا وزگۇن، انكارا قالاسىنىڭ تۇرعىنى:
- العاشقى ءۇش ايدا سىرتقا شىققان جوقپىن. ودان كەيىن تەك قاجەتتى جاعدايلاردا عانا كوشەگە شىقتىم. وندا بارلىق ساقتىق قۇرالدارىن ساقتاۋعا تۋرا كەلدى. ماسكا مەن اراقاشىقتىق بۇل كەزەڭدەگى ءومىرىمىزدىڭ ءبىر بولشەگىنە اينالدى. قوناققا بارمايمىن. ۇيگە ەشكىمدى قابىلدامايمىن. ماسەلەن، كەشە كورشىمىز قايتىس بولدى. بارعان جوقپىن.
تۇركيا بيلىگى 2020 -جىلى ەكونوميكادا % 5 ءوسىمدى بولجاعان. الايدا ۆيرۋس سالدارىنان بۇل كورسەتكىشتىڭ قالاي بولاتىنى بەيمالىم. دەگەنمەن ەلدىڭ قازىنا جانە قارجى ءمينيسترىنىڭ ايتۋىنشا، ەكونوميكا تومەندەپ، بىردەن قالپىنا كەلۋى ىقتيمال. ەڭ الدىمەن تۋريزم سالاسى تۇرالاپ قالعانىن ايتقانبىز. بىرنەشە كۇن بۇرىن، تۇرىك پارلامەنتى ەلدەگى ەكونوميكالىق جاعدايعا بايلانىستى جاڭا ۇكىم شىعاردى.
ول بويىنشا: جۇمىس بەرۋشىلەر 2021 -جىلدىڭ 30 -ماۋسىمىنا دەيىن جۇمىسشىلاردى رەسمي تۇردە جۇمىستان شىعارا المايدى؛
جۇمىس بەرۋشى كەز كەلگەن قىزمەتكەردى اقىسىز دەمالىسقا جىبەرە الادى. اقىسىز دەمالىس بولعان جاعدايدا مەملەكەت بۇرىن العان جالاقىسىنىڭ مولشەرىنە قاراماستان اي سايىن 1168 ليرا وتەماقى تولەيدى. جۇمىستان بوساتىلعان جاعدايدا قىزمەتكەر مەملەكەتتەن وتەماقى تولەمدەرىن الۋ قۇقىعىنان ايرىلادى.
تۇركيادا بيىل ءدىني مەرەكەگە ارنالعان دەمالىس 4 كۇنگە سوزىلماق. ازىرگە كومەندانتتىق ساعاتتىڭ ەنگىزىلمەيتىنى بەلگىلى. دەگەنمەن ساقتىق تالاپتارى قاتاڭ قاداعالانادى. قۇربان شالىنادى. الايدا مۇندا دا ماسكا مەن اراقاشىقتىق ساقتاۋ مىندەت. تەك جەرگىلىكتى اكىمشىلىك بەلگىلەگەن جەرلەردە عانا قۇرباندىق شالۋعا بولادى. ساقتىق شارالارىن ساقتاۋ ماقساتىندا قۇرباندىقتى ءبىرىنشى كۇن عانا ەمەس، 4 كۇن بويى شالۋ جوسپارلانعان. بۇدان بولەك، ەلدە قۇرباندىققا ونلاين تاپسىرىس بەرۋ ورىندارى ىسكە قوسىلدى.
بيىل ساۋد ارابياسى قاجىلىققا كەلەتىندەردىڭ سانىن 10 مىڭعا دەيىن قىسقارتتى. ونىڭ 30 پروتسەنتتى كورولدىڭ قۇزىرىنداعى ادامدار بولاتىنى بەلگىلى. قالعاندارى ساۋد ارابياسىندا تۇراتىن جاسى 20 مەن 50 ارالىعىنداعى شەتەل ازاماتتارى بولماق. بارلىعى كوروناۆيرۋستى انىقتايتىن تەست تاپسىرىپ، دارىگەردەن سوزىلمالى اۋرۋى جوق دەگەن انىقتاما الۋى كەرەك. ساۋد ارابيانىڭ ءدىن ىستەرى جونىندەگى مينيسترلىك قازىر قاجىلىققا قاتىساتىنداردىڭ بارلىعى 7 كۇندىك كارانتيندە ەكەنىن حابارلادى. ال قاجىلىق كەزىندە مەككەگە رۇقساتسىز كەلگەندەرگە 10 مىڭ رەال، نەمەسە 2666 دوللار ايىپپۇل سالىناتىن بولادى.
