كۇن ىستىقتا كولىكتە قالدىرۋعا بولمايتىن 10 زات
ەگەر دالادا كۇننىڭ ىستىعى 22C بولسا، 1 ساعاتتان كەيىن كولىك ىشىندەگى تەمپەراتۋرا 48C قا دەيىن كوتەرىلەدى. ءتىپتى، ىستىق كۇندەرى سالوننىڭ كەي تۇستارى 70C قا دەيىن قىزۋى مۇمكىن. سوندىقتان كۇن ىستىقتا كەي زاتتاردى كولىك سالونىندا قالدىرماۋعا تىرىسىڭىز. ول قانداي زاتتار؟
• ءدارى- دارمەك
كولىكتە ءدارى قوبديشاسىنىڭ بولۋى زاڭدى. كەز كەلگەن ۋاقىتتا قاجەت بولىپ قالۋى مۇمكىن. ال قوبديشادان بولەك دارىلەردى سالوندا ساقتاۋعا بولمايدى.
نەگىزىنەن ءدارى- دارمەك تۇرلەرى بولمە تەمپەراتۋراسىندا ساقتالادى. جازعى اپتاپ ىستىقتا ءدارىنىڭ كولىك ىشىندە بولۋى ونىڭ دەرتكە قارسى اسەرىن ازايتادى. ءتىپتى دەنساۋلىققا زاردابىن تيگىزۋى دە مۇمكىن.
• بوتەلكەدەگى سۋ
ىستىق كۇندەرى سۋدى كوپ ىشەمىز. كولىكتە ءجۇرىپ تە (سالون قانشا سالقىن بولسا دا) ءشول قىسادى. مۇندايدا بوتەلكەمەن سۋدى بىرگە الىپ جۇرەمىز، نە ساتىپ الامىز. كەيدە سول بوتەلكەدەگى سۋ سالوندا تۇرىپ جىلىپ- اق كەتەدى. ال مۇنىڭ دەنساۋلىققا زيانى كوپ. زەرتتەۋلەر ناتيجەسى بويىنشا، كۇن قىزعاندا پلاستيك بوتەلكەدەن بيسفەنول ا (حيميالىق زات) بولىنەدى. ونىڭ اسەرىنەن قاتەرلى ىسىك، جۇرەك اۋرۋىنىڭ تۇرلەرى پايدا بولۋى مۇمكىن.
ءقاۋىپ توندىرەتىن بيسفەنول عانا ەمەس، تىكە تۇسكەن كۇن ساۋلەسى اسەرىنەن سۋ مەن پلاستيك بوتەلكە لينزا سەكىلدى بولىپ سالوندى قىزدىرۋى دا مۇمكىن. مۇنىڭ اسەرىنەن جالىن شىقپاسىنا كىم كەپىل؟
• ەلەكترون قۇرىلعىلار
تەلەفون، پلانشەت، باتارەيالارمەن ىستەيتىن بالالار ويىنشىعىن كولىك سالونىندا قالدىرماڭىز. ىستىق ليتي باتارەيالاردىڭ ۇزاق شىداۋىنا كەرى اسەرىن تيگىزەدى. مىسالى، Apple ءونىمى ءوز قولدانۋشىلارىن 35C تا ەسكەرتەتىنىن ەستىگەن بولارسىز.
قىمبات ەلەكترون قۇرىلعىلاردى، گادجەتتەردى كولىكتە قالدىرماۋدىڭ تاعى ءبىر سەبەبى بار. سالوندا كورىنىپ- اق تۇرعان باعالى دۇنيەنى كورىپ، كەيبىرەۋلەردىڭ نيەتى بۇزىلۋى دا مۇمكىن.
• كۇننەن قورعايتىن كرەمدەر
كۇننەن قورعايتىن كرەمدەردى (ءتىپتى وزگە دە كرەم تۇرلەرىن) ىستىق تەمپەراتۋرادا ساقتاۋعا بولمايدى. جازدىڭ اپتاپ ىستىعىندا ءتىپتى قالدىرىپ كەتۋگە بولمايدى. الدىمەن كۇننەن قورعاۋ اسەرى تومەندەيدى. سونداي- اق قاتتى ىستىقتان قۇتىسى ءىسىنىپ، جارىلىپ توگىلۋى دە مۇمكىن.
• شوكولاد
شوكولاد 26C تەمپەراتۋرادا ەري باستايدى. ەرىگەن شوكولاد كولىك سالونىنا اقسا، ونى كەتىرۋدىڭ ءوزى ءبىر جىر.
• تاماق
كۇن ىستىق كەزدە كولىكتە پىسكەن تاعام تۇرلەرىن جانە ءسۇت ونىمدەرىن قالدىرماڭىز. جۇمىرتقا، ەت، بالىق، سونداي- اق كرەمى بار ءتاتتى ناندى دا ساقتاماڭىز. بۇلاردى كۇن ىستىقتا توڭازىتقىشتان تىس 2 ساعاتقا قانا ساقتاۋعا بولادى. ال تەمپەراتۋرا 32C تان جوعارى بولسا، وندا ساقتاۋ ۇزاقتىعى 1 ساعاتقا دەيىن قىسقارادى. ىستىقتان تاماق تەز اشىپ بۇزىلادى. اشىعان تاماق - دەنساۋلىققا زيان.
• وتتىق
تەمەكى تۇتاتىن وتتىق ىستىقتان تەز جارىلۋى مۇمكىن. اسىرەسە گازى بار وتتىقتان اباي بولىڭىز. بەنزينى بارى دا قاۋىپسىز دەپ ايتۋعا كەلمەيدى. سوندىقتان وتتىقتى كولىك سالونىندا عانا ەمەس، بالكوندا، تەرەزە الدىندا قالدىرماۋعا دا تىرىسىڭىز.
• اەروزول
دەزودورانت، تاماققا ارنالعان سپرەي جانە باسقا دا اەروزول تۇرلەرىن كولىكتە قالدىرماڭىز. ىستىقتان اەروزول باللونى ءىشى ءىسىنىپ جارىلۋى مۇمكىن.
• وسىمدىك
بولمە وسىمدىگىن، بولماسا گۇلدى ىستىق كۇنى كولىك سالونىندا قالدىرماڭىز. 50C قا دەيىن قىزاتىن بولسا سولىپ قالادى نەمەسە تىرشىلىگىن توقتاتادى.
• كوزىلدىرىك
كولىك جۇرگىزگەندە كۇن ساۋلەسىنەن قورعايتىن كوزىلدىرىك تاعاتىندار كوپ. ال ونى تۇسكەندە كولىك سالونىنداعى پانەلگە قويۋ سالۋعا بولمايدى. ىستىقتان قىزىپ كەتەدى. ءتىپتى اپتاپ ىستىق بولسا، كولىك تەرەزەسى اسەرىنەن ەرۋى دە مۇمكىن. ساقتىقتا قورلىق جوق. كوزىلدىرىكتى كۇننەن تاسا ورىنعا قويىپ شىعىڭىز.
massaget.kz
