شىمكەنتتە ءبىر تاۋلىكتە 10 ءورت تىركەلگەن
شاھاردا ەكى نىسان وتقا ورانىپ، قۇرعاق ءشوپ پەن قوقىس جاشىكتەرى ورتەنگەن، دەپ حابارلايدى قازاقپارات ءتىلشىسى.
قالالىق توتەنشە جاعداي دەپارتامەنتى باسپا ءسوز قىزمەتىنىڭ مالىمەتىنشە، شاقىرتۋلاردىڭ ءبىرى ءنۇرسات شاعىن اۋدانىنداعى ازىق- تۇلىك دۇكەنىنەن تۇسكەن.
وقيعا ورنىنا ءورت ءسوندىرۋ بولىمشەلەرى جەتكەندە بەس قاباتتى تۇرعىن ۇيگە جاپسارلاسا سوعىلعان دۇكەننىڭ پلاستيكالىق تەرەزە جاقتاۋلارى جانە ەكىنشى قاباتىندا ورنالاسقان «دونەر» ورتالىعىنىڭ توبەسىندەگى جاپپاسى جانىپ جاقانىن انىقتاعان. ءتىلسىز جاۋدى اۋىزدىقتاۋعا ءورت ءسوندىرۋ ءبولىمىنىڭ جەكە قۇرامىندا 28 ادام مەن 5 تەحنيكا جۇمىلدىرىلىپ، جالىن تۇنگى ساعات 04.00 - دە تولىعىمەن سوندىرىلگەن.
تاعى ءبىر ءورت ەڭبەكشى اۋدانىندا «كورتۋس» ءدامحاناسىنىڭ اۋلاسىندا تىركەلدى. مۇندا كولەمى 195 شارشى مەتر اعاش ورىندىقتارى مەن تاپشاندار جانە اعاش قورشاۋلارى جانىپ، جالىن قاسىندا ورنالاسقان 120 شارشى مەتردى قۇرايتىن «ينستا بار» كافەسىنە ءوتىپ كەتكەن. ءورت ءسوندىرۋ قىزمەتىنىڭ جەكە قۇرامىندا 36 ادامى مەن 7 تەحنيكاسى جانە «اپاتتار مەديتسينالىق ورتالىعى» فيليالىنىڭ 1 بريگاداسى وقيعا ورنىنا جەتىپ، 04:41 مينۋتتا ءورت تولىعىمەن سوندىرىلگەن.
بارلىق 10 ءورت وقيعاسى بويىنشا زارداپ شەككەندەر مەن قايتىس بولعاندار تىركەلمەگەن.
