وسكەمەندە ءبىر ساعاتتىڭ ىشىندە توتەنشە جاعداي رەجيمىن بۇزعان 10 جۇرگىزۋشى انىقتالدى

ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، كاسىپ يەلەرىنە بەرىلگەن رۇقسات قاعازدارى ولاردىڭ كۇن سايىن قالا ىشىندە جۇرۋىنە مۇمكىندىك بەرەدى. تەك الدىن الا بەكىتىلگەن مارشرۋتتان اۋىتقىماۋ كەرەك.

وسى رەتتە «سەرگەك» كامەرالارى ارنايى رۇقسات العان كولىك قۇرالدارىنىڭ قوزعالىسىن باقىلاۋعا مۇمكىندىك بەرەدى.

«انىقتالعانداي، جاسىل ءتۇستى رۇقسات قاعازى بار جۇرگىزۋشىلەردىڭ اراسىندا زاڭ تالابىن ورىندامايتىندارى دا بار. ءبىر ساعاتتىڭ ىشىندە وسىنداي 10 كولىك توقتاتىلدى. پوليتسيا قىزمەتكەرلەرى ولارعا ءتۇسىندىرۋ جۇمىستارىن جۇرگىزىپ، شەكتەۋ شارالارىن قاتاڭ ساقتاۋ كەرەكتىگىن ەسكەرتتى. ەگەر جۇرگىزۋشىلەر تاعى دا وسىنداي زاڭبۇزۋشىلىققا جول بەرىپ جاتسا، 15 تاۋلىككە قاماۋعا الىنۋى مۇمكىن»، - دەپ حابارلادى ۆەدومستۆو وكىلدەرى.

اۆتور: تالعاتجان مۇحامەتبەك ۇلى