شەتەلدىك ۇيىم عاشىقتارعا جالاقىسى 10 مىڭ دوللار بولاتىن جۇمىس ۇسىنىپ وتىر

نۇر-سۇلتان. قازاقپارات - امەريكاندىق زەرگەرلىك ۇيىم عاشىقتار جۇبىن ىزدەستىرۋدە. ولار الەمنىڭ تۇكپىر- تۇكپىرىن ارالاپ، ەڭ رومانتيكالىق جەرلەردى ىزدەيتىن بولادى.

شەتەلدىك ۇيىمنىڭ مالىمدەۋىنشە، جالدانعان جۇپ ەۋروپانى ارالاپ، ۇيلەنۋ تۋرالى ۇسىنىس جاسايتىن ەڭ كورىكتى جەر ىزدەيدى. بۇعان قوسا عاشىقتار وزدەرىنە ىڭعايلى جۇمىس ۋاقىتىن قۇراستىرا الادى.

جالاقىسى 10 مىڭ دوللاردى قۇرايتىن بۇل قىزمەتكە ۇيىمداستىرۋشىلار ساعاتىنا اقشا تولەيمىز دەپ وتىرعان كورىنەدى. بۇل جۇمىسقا كىرۋ ءۇشىن عاشىقتار بىرنەشە سۇراقتارعا جاۋاپ بەرىپ، نەلىكتەن ولاردى تاڭداۋ دۇرىس شەشىم ەكەندىگىن ايتۋلارى كەرەك. سونىمەن قاتار ولار وزدەرى جايلى بەينەجازبانى ۇيىمداستىرۋشىلاردىڭ سايتىنا جۇكتەۋلەرى ءتيىس.

بۇل جۇمىسقا شاقىرىپ وتىرعاندار عاشىقتاردىڭ شىنايىلىعىن تەكسەرەتىن بولادى، ءبىراق ولاردىڭ رەسمي تۇردە نەكەلەسپەگەن بولۋلارى مىندەتتى. ال ەگەر جۇپتار الەۋمەتتىك جەلىنىڭ بەلسەندى قولدانۋشىلارى بولسا تىپتەن جاقسى ەكەن.

بۇل جۇمىسقا ءوتىنىش 14-28 - اقپان ارالىعىندا قابىلدانادى، ال جەڭىمپاز جۇپ 6 -ءساۋىر كۇنى انىقتالادى.