قىتايدا 10 مىڭنان استام وتانداسىمىز ءجۇر - ەلجان ءبىرتانوۆ
«قازىر قىتايدا جۇرگەن ازاماتتارىمىز كوپ- اق. قازاقستان رەسپۋبليكاسى سىرتقى ىستەر مينيسترلىگىنىڭ مالىمەتىنشە، 10 مىڭنان استام وتانداسىمىز قىتايدا ءجۇر. قازاقستان ازاماتتارى، ارينە، ەلگە ورالۋى كەرەك. ءبىز اۋە ساپارلارىن شەكتەمەيمىز، ولار قايتىپ كەلىپ جاتىر. سونىمەن قاتار، قاجەت بولعان جاعدايدا قىتايدىڭ باسقا ايماقتارىنان ازاماتتاردى ەۆاكۋاتسيالاۋ ءۇشىن ۇكىمەت قازىرگى ۋاقىتتا چارتەرلىك رەيستەردى قولدانا وتىرىپ، ولاردى ەلگە اكەلۋدى قاراستىرۋدا. قازاقستان ازاماتتارىنىڭ ق ح ر- دىڭ باسقا قالالارىنان ورالۋىنا ەشقانداي شەكتەۋ جوق»، - دەدى دەنساۋلىق ساقتاۋ ءمينيسترى ەلجان ءبىرتانوۆ و ك ق- دا وتكەن باسپا ءسوز ءماسليحاتىندا.
ءمينيستردىڭ ايتۋىنشا، قازاقستاندىقتار رەيستىك ۇشاقتارمەن دە، چارتەرلىك رەيستەرمەن دە ەلگە ورالا الادى.
«ۇكىمەت ق ر سىرتقى ىستەر مينيسترلىگىمەن بىرگە بارلىق ماسەلەنى باقىلاۋدا ۇستاپ وتىر. بارلىق ازاماتتارمەن بايلانىسىمىز بار. ولاردىڭ جاعدايىن دا قاداعالاپ وتىرمىز. بۇگىنگى تاڭدا قازاقستان ازاماتتارى اراسىندا مۇنداي جاعدايلار تىركەلگەن جوق. ولاردىڭ ءوتىنىشى بويىنشا ەلگە قايتارامىز. ال شىنتۋايتىندا ولاردىڭ ءبارى بىردەي ەلگە قايتقىسى كەلىپ وتىرعان جوق. بۇل جۇمىس جوسپارلى تۇردە ءجۇرىپ جاتىر»، - دەپ ءتۇسىندىردى دەنساۋلىق ساقتاۋ ءمينيسترى.
اۆتور: ايان بەكەن ۇلى
