10-تامىز كۇنى جەرگە ۇلكەن استەرويد جاقىندايدى
ول ساعاتىنا 16,772 شاقىرىم جىلدامدىقپەن قوزعالۋدا. بۇل تۋرالى NASA امەريكالىق عارىش اگەنتتىگىنە سىلتەمە جاساعان Hi-news.ru حابارلادى.
عالىمدار اسپان وبەكتىسىنە 2006QQ23 اتاۋىن بەردى. ولاردىڭ ايتۋىنشا، استەرويد كوكتى تىرەگەن عيماراتتان كەم ەمەس، ال ديامەترى 600 مەترگە جۋىق.
ماماندار اسپان دەنەسىنىڭ كولەمى ۇلكەن بولعانىمەن، جەر مەن جالپى عالامشارعا قاۋىپ توندىرمەيتىنىن ايتتى.
استەرويد العاش رەت 2006-جىلى تابىلدى. ونىڭ ناقتى كولەمى - 569 مەتر.
جاقىنداپ كەلە جاتقان اسپان دەنەسىنىڭ كولەمىن ءتۇسىنۋ ءۇشىن ماماندار ونى امەريكاداعى بيىك ەمپاير-ستەيت-بيلدينگ عيماراتىمەن سالىستىردى، ونىڭ جالپى بيىكتىگى 443 مەتردى قۇرادى.
ناسانىڭ پلانەتالىق قورعانىس قىزمەتىن ۇيلەستىرۋ باسقارماسىنىڭ ماماندارى ليندلي دجونسون مەن كەللي فاست استەرويد جەردەن شامامەن 7,5 ميلليون شاقىرىم قاشىقتىقتا ۇشاتىندىعىن ءتۇسىندىردى.
سالىستىرۋ ءۇشىن ولار ايدىڭ ءبىزدىڭ پلانەتامىزدان 384000 شاقىرىم قاشىقتىقتا ەكەنىن، ياعني شامامەن 20 ەسە جاقىن ەكەنىن ايتتى.
استەرويدتاردان باسقا، عالىمدار جەرگە وتە جاقىن ورنالاسقان قۇيرىقتى جۇلدىزدار مەن اسپان دەنەلەرىن باقىلايدى. مامانداردىڭ سوزىنشە، پلانەتاعا شامامەن 8 ميلليون شاقىرىمعا جاقىنداعان نىساندار «جەرگە جاقىن» دەپ اتالىپ، ولار باقىلاۋدى قاجەت ەتەدى.
سونىمەن بىرگە، عالىمدار جىل سايىن پلانەتاعا شامامەن 6 استەرويد كەلەتىنىن، ولاردىڭ ولشەمدەرى 2006QQ23-تەن ءسال عانا وزگەشەلەۋ بولاتىنىن ايتتى.
ماماندار جەر وسىنداي كولەمدەگى استەرويدپەن سوقتىعىسسا، اپاتتان قاشىپ قۇتىلۋ مۇمكىن ەمەس دەيدى.