اتىراۋدا اۆتوجول قۇرىلىسى بارىسىندا 10 مەتر تەرەڭدىكتەن ادام سۇيەكتەرى تابىلدى
بەلگىلى بولعانداي ءۇش ادامنىڭ سۇيەگى 10 مەتر تەرەڭدىكتە توپىراق استىنان شىققان. ايتا كەتسەك، بۇل جەر قورىمنان ءبىراز قاشىقتىقتا ورنالاسقان. «اقتوبە- اتىراۋ- استراحان» اۆتوجولىن قايتا جاڭارتۋ جۇمىستارىنىڭ باس مەردىگەرى «سينەميداسستروي» كومپانياسى وكىلدەرى اتالمىش وقيعا تىركەلگەن ساتتەن باستاپ، كارەردەگى بارلىق جۇمىستاردى توقتاتتى. سونداي-اق، مەردىگەر كومپانيانىڭ باسشىسى كارەر جۇمىسىن باسقا جەرگە اۋىستىرۋدى تاپسىردى.
«جەرگىلىكتى تۇرعىنداردىڭ جانە اقساقالداردىڭ ايتۋىنشا، اتالمىش جەردە قورىم بولعانىن ەشكىم بىلمەگەن. تابىلعان ادام سۇيەكتەرى قاي عاسىرعا جاتاتىنى ازىرگە بەلگىسىز. قۇقىق قورعاۋ ورىندارى ءتيىستى ساراپتاما جۇرگىزگەننەن كەيىن ادام سۇيەكتەرى اۋىل ىرگەسىندەگى قورىمعا جەرلەنەدى»، دەلىنگەن حابارلامادا.
ەسكە سالساق، كارەردەگى جۇمىسشىلار ادام سۇيەكتەرى تابىلعان ساتتە مەردىگەر مەكەمە «سينەميداسستروي» باسشىلارىنا حابارلاماستان تەلەفونعا ءتۇسىرىپ الەۋمەتتىك جەلىگە جاريالاپ جىبەرگەن بولاتىن.
قۇرمانعازى اۋدانى اكىمى قايرات نۇرتايەۆ كارەر باسىنداعى جۇمىسشىلارمەن اڭگىمەلەسىپ، اتالمىش جاعداي كەزدەسسە دەرەۋ اۋدان اكىمدىگىنە، «سينەميداسستروي» كومپانياسى باسشىلارىنا حابار بەرۋدى ەسكەرتتى.