يندونەزيا استاناسى 10 جىلدان كەيىن سۋ استىندا قالۋى مۇمكىن

نۇر-سۇلتان. قازاقپارات - يندونەزيا سوڭعى 15 جىل ىشىندە توپىراق قاباتىنىڭ شوگۋى جانە تەڭىز دەڭگەيىنىڭ كوتەرىلۋىنە بايلانىستى، قۇرلىقتاعى 29 مىڭ گەكتارداي جەرىنەن ايىرىلدى.

بۇل دجاكارتانىڭ اۋدانىمەن پارا-پار. بۇل جايلى The Jakarta Post گازەتى جازدى، دەپ حابارلايدى قازاقپارات.

ەلدىڭ تەڭىز ىستەرى جانە بالىق شارۋاشىلىعى مينيسترلىگىنىڭ دەرەكتەرىنە قاراعاندا، ياۆا ارالىنداعى جاعداي قاتتى الاڭداتادى. ارالدىڭ سولتۇستىك جاعالاۋىنداعى جەر كۇشتى ەروزياعا ۇشىراعان.

بۇعان تەڭىزدىڭ قۋاتتى تولقىندارى، سونىمەن قاتار جەرگىلىكتى تۇرعىنداردىڭ شارۋاشىلىق قىزمەتى دە اسەر ەتىپ وتىر.

كەسىلگەن ورماندار مەن پلانتاتسيالاردىڭ ورنى جىلدام ەروزياعا ۇشىراپ بارادى. ساراپشىلاردىڭ ايتۋىنشا، دجاكارتادا توپىراق قاباتى جىلىنا 10-25 سانتيمەتر شوگەدى. بيلىكتى الاڭداتاتىن تاعى ءبىر جايت، قالا اۋماعىنىڭ %40 عا جۋىعى ونسىز دا تەڭىز دەڭگەيىنەن تومەن ورنالاسقان.

ەگەر جاعداي وڭدالماسا، 2030-جىلعا قاراي دجاكارتا تولىقتاي سۋ استىندا قالۋى مۇمكىن. قازىرگى تاڭدا دجاكارتادا ون ميلليونعا جۋىق حالىق تۇرادى.