الەمدەگى ەڭ قاۋىپتى 10 لاڭكەس

وسىدان بىرنەشە كۇن بۇرىن اق ءۇي قوجايىنى ترامپ ءوزىنىڭ تۆيتتەردەگى جازباسىندا ءال-باداۆيدىڭ ولتىرىلگەنىن ءمالىم ەتتى. ۋساما بەن لادەننەن كەيىن قاۋىپتى لاڭكەس اتانعان ونى ا ق ش جۇيەسى سوڭعى ون جىلدان بەرى ىزدەپ ءجۇر.

-  ءبىز كەزىندە «كوۋل» كەمەسىنە شابۋىل جاساعان قاۋىپتى لاڭكەستىڭ كوزىن جويدىق. الداعى ۋاقىتتا دا «ءال كايدا» ۇيىمىنا قارسى جۇمىسىمىز جالعاسا تۇسەدى. ءبىز راديكالدى يسلام ۇيىمىنىڭ كوزىن جويىپ، الەمگە تىنىشتىق اكەلۋىمىز كەرەك»، -  دەپ مالىمدەدى دونالد ترامپ.

ا ق ش بارلاۋشىلارى سوڭعى ون جىلدان بەرى جامال احماد مۇحامماد ءال-باداۆيدىڭ ىزىنە تۇسكەن. 2000 -جىلدىڭ 12 -قازانى كۇنى «كوۋل» كەمەسىنە شابۋىل جاساعان ءال- باداۆيدىڭ سودىرلارى 17 امەريكالىق تەڭىزشىنىڭ كوزىن جويعان.

جارىلىستىڭ سالدارىنان 39 اسكەري جاراقات الدى. ودان كەيىن ءىزىن جوعالتقان باداۆي يەمەن رەسپۋبليكاسىندا جاسىرىنىپ جۇرگەن. ا ق ش بارلاۋشىلارى ارنايى وپەراتسيانى جۇزەگە اسىرۋ كەزىندە ونىڭ كوزىن جويدى. ول كولىكتە جالعىز ءوزى كەلە جاتقان. باسقا زارداپ شەككەندەر جوق. سوڭعى 20 جىل ۋاقىت بويى ءال- ءباداۆيدىڭ سودىرلارى الەمنىڭ ءار تۇكپىرىندە 50-دەن استام لاڭكەستىك جارىلىس جاساعانىن ايتا كەتۋ قاجەت.

ونىڭ قاي جەردە جۇرگەنى تۋرالى اقپارات بەرگەن ادامعا فەدەرالدىق تەرگەۋ بيۋروسى 5 ميلليون دوللار تىككەن. 2003 -جىلى ونى يەمەن بيلىگى ءولىم جازاسىنا كەسكەن، الايدا تۇرمەدەن قاشىپ كەتكەن ونىڭ قاي جەردە جۇرگەنى بەلگىسىز بولدى. اقىرى، مىنە، لاڭكەستىڭ ءوزى اجال قۇشتى.

الەمدە ىزدەۋدە جۇرگەن مۇنداي لاڭكەستەر كوپ. ونىڭ ءبىرقاتارىنىڭ قازىردىڭ وزىندە كوزى جويىلعان. ال ا ق ش فەدەرالدىق تەرگەۋ بيۋروسىنىڭ دەرەگىنشە، حالىقارالىق ىزدەۋدە جۇرگەن قاۋىپتى 10 لاڭكەس كىم؟ سونىمەن...

ۋساما بەن لادەن. ا ق ش- تىڭ مەملەكەتتىك مەكەمەلەرى مەن عيماراتتارىنا شابۋىل جاساعان. جۇزدەگەن ادامداردىڭ ءومىرىن قيعان. ا ق ش-تىڭ تانزانيا جانە كەنيا ەلدەرىندەگى ەلشىلىگىندە لاڭكەستىك ارەكەت جاساپ، سونىڭ سالدارىنان 200 ادام وپات بولعان. 2011 -جىلدىڭ 2 -مامىرىندا ۋساما بەن لادەن ءولدى. ا ق ش-تىڭ بارلاۋ قىزمەتى جاسىرىنىپ جاتقان جەرىن تاۋىپ، اۋەدەن سوققى جاساعان.

 ايمان ءال-زاۆاحير. ماماندىعى - دارىگەر. «ەگيپەت يسلام جيحادى» ۇيىمىن قۇرعان ادام. ونىڭ سودىرلارى جۇزدەگەن ادامدى قۇربان ەتتى. 1998 -جىلدىڭ 7 -تامىزىنان بەرى ىزدەۋدە ءجۇر. ايمان ءال زاۆاحيردىڭ قايدا جۇرگەنى تۋرالى اقپارات بەرگەن ادامعا 25 ميلليون دوللار ۋادە ەتىلگەن.

ادام گادان. كاليفورنيادا تۋىلىپ، جالپاق جۇرتقا اززام ءال-امريكي دەگەن اتپەن بەلگىلى بولعان ول لاڭكەستىك ۇيىم قۇرعان. فەدەرالدىق تەرگەۋ بيۋروسىنىڭ دەرەگىنشە، ا ق ش بيلىگىنە مەملەكەتتىك وپاسىزدىق جاساعان ادام. 2006 -جىلدان بەرى حالىقارالىق ىزدەۋدە ءجۇر. گاداننىڭ باسىنا 1 ميلليون دوللار تىگىلگەنىن ايتا كەتۋ كەرەك.

دانيەل اندرەاس سان ديەگو. 2003 -جىلدارى ا ق ش- تىڭ كاليفورنيا شتاتىنداعى ەكى ۇلكەن ءزاۋلىم عيماراتقا جارىلىس جاساعان. ونىڭ قايدا جۇرگەنى بەلگىسىز. فبر ونى تاپقان ادامعا 250 مىڭ دوللار بەرۋگە ۋادە ەتكەن.

فاحد موحاممەد احمەد ءال كۋسو. ا ق ش- تىڭ ازاماتتارىن، اسكەري قىزمەتشىلەرىن ءولتىرىپ، الەمنىڭ ءبىرقاتار ەلدەرىندە جارىلىس جاساعان. 2000 -جىلدىڭ 12 -قازانىندا يەمەننىڭ ادان پورتىندا لاڭكەستىك ارەكەت ۇيىمداستىرعان. ونىڭ باسىنا 5 ميلليون دوللار تىگىلگەن.

جامەل احمەد موحاممەد ءالي ءال باداۆي. بۇل لاڭكەس تۋرالى جوعارىدا جازدىق. 2003 -جىلى يەمەن بيلىگى ۇستاعانىمەن، ول 2006 -جىلى قولداۋشىلارىنىڭ ارقاسىندا اباقتىدان قاشىپ شىعادى.

موحاممەد ءالي حامادەي. «حەزبوللا» لاڭكەستىك ۇيىمىنىڭ بەلسەندى مۇشەسى. ۇشاقتا، جەردە، پويىز بەن عيماراتتاردا كەپىلدىككە ادام ۇستاپ، بىرنەشە عيمااراتتاردى جارعان. سونىڭ سالدارىنان جۇزدەگەن ادام وپات بولدى..

 ءالي اتۆا. ول دا «حەزبوللا» ۇيىمىنىڭ بەلسەندى مۇشەسى. الەمنىڭ ءار تۇكپىرىندە جارىلىستار جاساعان. 1985 -جىلدىڭ 14 -ماۋسىمىندا ول سودىرلارمەن بىرگە اۆيالاينەردەگى جولاۋشىلاردى كەپىلدىككە العان. ونىڭ دا باسىنا 5 ميلليون دوللار تىگىلگەن.

حاسان يزز ءال دين. «حەزبوللا» لاڭكەستىك ۇيىمىنىڭ مۇشەسى. بۇگىنگى كۇنگە دەيىن قايدا جۇرگەنى بەلگىسىز. ول تۋرالى اقپارات بەرگەن ادامعا ا ق ش-تىڭ فەدەرالدىق بيۋروسى 5 ميلليون دوللار بەرۋگە ۋادە ەتكەن. افينادان ريمگە ۇشىپ شىققان ۇشاقتى باسىپ العان. ونداعى ادامداردى كەپىلدىككە الىپ، بەيرۋتكە قونعان. وسى كەزدە ۇشاقتاعى بىرنەشە ادامدى اتىپ كەتكەن. سونىڭ سالدارىنان ونداعان ادام ءولىپ، جاراقات العان.

ابدۋللا احمەد ابدۋللا. ا ق ش-تىڭ بىرنەشە ازاماتىن ولتىرگەن، بىرنەشە عيماراتتاردا جارىلىس جاساعان. ا ق ش- تىڭ تانزانيا جانە كەنياداعى ەلشىلىگىندە 1998 -جىلدىڭ تامىز ايىندا جارىلىس ۇيىمداستىرعان. بۇگىنگى كۇنگە دەيىن قايدا جۇرگەنى بەلگىسىز. ونىڭ دا باسىنا 5 ميلليون دوللار تىگىلگەن.

«قامشى» سىلتەيدى