استانانىڭ قۇرىلىس سالىناتىن اۋماعى 10 مىڭ گەكتارعا وڭتايلاندىرىلدى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا استانا قالاسىنىڭ اكىمى باقىت سۇلتانوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسىن ورىنداۋ ماقساتىندا اكىمدىكپەن استانا قالاسىنىڭ 2019-2023-جىلدارعا ارنالعان جيناق قۇرىلىسى جونىندەگى كەشەندى جوسپاردىڭ جوباسى ازىرلەنىپ، ۇكىمەت وتىرىسىنىڭ قاراۋىنا ۇسىنىلىپ وتىر. جوبا بارلىق مۇددەلى مەملەكەتتىك ورگاندارمەن كەلىسىلگەن. بۇل ەلوردامىزدىڭ دامۋىنىڭ بارلىق ماسەلەلەرىن قامتيتىن قۇجات»، - دەپ اتاپ ءوتتى قۇجاتتى تانىستىرعان قالا باسشىسى.
ونىڭ ايتۋىنشا، قالانىڭ يگەرۋ اۋماعىنىڭ شەكارالارى 25700 گەكتاردان 15400 گەكتارعا دەيىن وڭتايلاندىرىلدى جانە 5 پەرسپەكتيۆالى قۇرىلىس سالۋ ايماعى انىقتالدى. حالىقتىڭ كوشى-قون جانە تۋۋ كورسەتكىشتەرىنىڭ ءوسۋى ەسەبىنەن حالىق سانىنىڭ جىل سايىن ورتاشا ەسەپپەن 2,5 پايىزعا ۇلعايۋى كۇتىلەدى جانە 2030-جىلعا قاراي شامامەن 2 ميلليون تۇرعىنعا جەتۋى جوسپارلانعان.
«بولجام بويىنشا ەكونوميكا ءوسىمىنىڭ جىل سايىنعى قارقىنىنىڭ 4 پايىزدان 6 پايىزعا دەيىن ارتۋى ەسەبىنەن 2023-جىلعا قاراي ەلوردانىڭ جالپى وڭىرلىك ءونىمى 70 پايىزعا ۇلعايىپ، 10 تريلليون تەڭگەدەن اسادى. بۇدان باسقا شاعىن جانە ورتا بيزنەس سۋبەكتىلەرىنىڭ سانى 216 مىڭنان اسىپ، 37 پايىزدان استام وسەدى. وڭىرلىك جالپى ونىمدە شاعىن جانە ورتا بيزنەستىڭ ۇلەسى 2023-جىلى 57 پايىزعا دەيىن ارتادى»، - دەدى باقىت سۇلتانوۆ.
